काठमाडौं (हाम्रो खेलकुद) – अखिल नेपाल फुटबल संघ (एन्फा) अन्तरगतको रेफ्री कमिटिका सदस्य सुरेन्द्र शिख्राकारले पदबाट राजीनामा दिएका छन् ।

सिख्राकारले एन्फा अध्यक्ष कर्माछिरिङ शेर्पालाई सम्बोधन गर्दै मंगलबार राजीनामा पत्र बुझाएको जानकारी गराए । ५ सदस्यीय रेफ्री कमिटिको संयोजकमा रबिन्द्रनाथ श्रेष्ठ संयोजक छन् । सिख्राकारसहित सदस्यमा बुद्धि बहादुर गुरुङ, बलराम थापा, गजेन्द्रमान सिंह छन् ।

रेफ्रीको हकहितका लागि हुनुपर्ने तर, रेफ्री कमिटी त्यसको विपरित भएकाले त्यो ठाउँमा बस्नु उपयुक्त नहुने ठानेर राजीनामा दिएको सिख्रकारले बताए । ‘मुख्य कुरा फिफा रेफ्री नियुक्ति, रेफ्री डिपार्टमेन्टमा रेफ्री पृष्ठभुमि बाहिरको मान्छे राख्नुमा मेरो आपत्ति हो । विधानमा रेफ्री पृष्ठभुमिको व्यक्ति नै राख्नुपर्ने प्रावधान छ । तर, त्यहाँ एन्फाकै कर्मचारीलाई नियुक्ति दिइएको छ ,’ सिख्राकारले भने ।

सिख्राकारको गुनासो छ ‘कोभिडका कारण खेलहरु पनि नभएको अवस्थामा बेलामा फिटनेस टेस्ट लिनु हुदैन भनेका थियौं । उहाँहरुले लिनुभयो । त्यो ठिकै छ । तर त्यसपछि महिलाको मात्रै पुनः रिटेस्ट लिइदा पुरुषको पनि लिन आग्रह गर्दा मान्नुभएन । यसमा पनि मेरो विमति हो ।’

यस्तै सिख्राकारका अनुसार फिफा रेफ्री रहेका सुदिश पाण्डे र श्रवण लामालाई उहाँहरुलाई फिफा रेफ्रीमा निरन्तरता दिनुपर्छ भन्ने माग राखिएको थियो । त्यो पनि स्वीकार नगरिसकेपछि त्यहाँ बस्नुको अर्थ नदेखेर राजीनामा दिएको उनले बताए । फिफा रेफ्री पाण्डे विदेशमा तथा अर्को फिफा रेफ्री लामा खुट्टाको शल्यक्रियाका कारण बेड रेस्टमा रहेको समयमा एन्फाले फिटनेस परिक्षण गरेको थियो ।