एजेन्सी – इंग्लिस प्रिमियर लिगमा म्यानचेस्टर युनाइटेड र एभर्टनले रोमाञ्चक बराबरी खेल्दै अंक बाँडेका छन् ।

ओल्डट्राफोर्डमा शनिबार राति भएको खेलमा घरेलु टोलीले २–० को अग्रता र त्यसपछि पनि लिएको अग्रता जोगाउन नसक्दा बराबरीमा चित्त बुझाउनु परेको हो ।

युनाइटेडका इडिन्सन काभानी, ब्रुनो फर्नान्डेस र स्कट म्याकटोमिनेले गोल गर्दा एभर्टनका एब्डुलाए डोयकाउरे, हामेस रोड्रिग्वेज र डोमिनिक काल्भर्ट लेविनले गोल गरे ।

खेलको २४औं मिनेटमा काभानीको गोलबाट घरेलु टोली युनाइटेडले अग्रता लिएको थियो । उनले मार्कुस रासफोर्डको पासमा गोल गरेका थिए । ४५औं मिनेटमा ब्रुनो फर्नान्डेसले आरोन वान बिशाखाको पासमा गोल गर्दै युनाइटेडलाई पहिलो हाफमा २–० को अग्रता दिलाए ।

४९औं मिनेटमा एब्डुलाए डोउकाउरेले गोल गर्दै एभर्टनलाई खेलमा फर्कने संकेत दिए । ५२औं मिनेटमा एब्डुलाए डोउकाउरेकै पासमा हामेस रोड्रिग्जेवले गोल गर्दै खेललाई २–२ गोलको बराबरीमा ल्याए ।

७०औं मिनेटमा लुका साको पासमा स्कट म्याकटोमिनेले गोल गर्दै युनाइटेडलाई पुनः ३–२ को अग्रता दिलाए । इन्ज्युरी समयको थप गरिएको पाँचौ मिनेटमा डोमिनिक काल्भर्ट लेविनले गोल गर्दै एभर्टनलाई हारबाट जोगाए । उनले माइकल किनको पासमा गोल गरेका थिए ।

यो बराबरीसँग युनाएटेडले शीर्षस्थानको म्यानचेस्टर सिटीसँगको अंक दुरी बराबरी गर्ने मौका गुमाएको छ । दोस्रो स्थानमा रहेको युनाइटेडको २३ खेलबाट ४५ अंक रहेको छ ।

दुई खेल कम खेलेको शीर्षस्थानको म्यानचेस्टर सिटीको ४७ अंक छ । एभर्टन २१ खेलबाट ३७ अंक जोडेर छैटौ स्थानमा रहेको छ ।