एजेन्सी – युइएफए च्याम्पियन्स लिगको प्रि–क्वाटरफाइनलको दोस्रो लेगमा आज राति फ्रान्सेली क्लब पेरिस सेन्ट जर्मेन (पीएसजी) ले घरेलु मैदानमा क्याटलान क्लब बार्सिलोनाको सामना गर्दैछ ।

खेल पार्क दि प्रिन्सेसमा नेपाली समयअनुसार राति १ः४५ बजे हुनेछ । पहिलो लेगमा बार्सिलोनालाई उसकै मैदानमा ४–१ ले पराजित गरेको पीएसजी घरेल मैदानमा पनि सोही जितलाई निरन्तरता दिदै क्वाटरफाइनल पुग्ने दाउमा हुनेछ ।

पीएसजीलाई यही नतिजा नै अघिल्लो चरण प्रवेश गर्न पर्याप्त हुुनेछ । ३–० को हारले पनि पीएसजी अघिल्लो चरण प्रवेश गर्नेछ । पहिलो लेगमा ह्याट्रिक पुरा गरेका फ्रान्सेली युवा फरवार्ड केलियन एमबाप्पे टोलीका लागि दोस्रो लेगमा पनि मुख्य हतियार हुनेछ ।

टोलीसँग एमबाप्पेसँगै मोउरो इकार्डी, एन्जल डि मारिया, मार्काे भेराट्टी, इड्रिसा गाना गुआई, ड्यानिल पारेडेस, लेभिन कुर्जावा, प्रेसनेल किमपेम्वे, मार्किन्हस, एलेसान्द्रो फ्लोरेन्जी र गोलरक्षक केलर नाभास टोलीसँग रहेका छन् ।

यता, बार्सिलोना पनि सनसनीपुर्ण नजिता निकाल्दै अघिल्लो चरण पुग्ने दाउमा हुनेछ । घरेलु मैदानमा पहिलो लेगमा ४–१ ले पराजित भएको बार्सिलोनालाई अघिल्लो चरण प्रवेश गर्न कम्तीमा पनि ४–० को जितको खाँचो छ ।

बार्सिलोनाले यो नतिजा उल्ट्याउन सक्ने क्षमता राख्दछ । २०१७ मा प्रि–क्वाटरफाइनलमै पहिलो लेगमा ४–० ले पछि परेको बार्सिलोनाले दोस्रो लेगमा ६–१ को सनसनीपुर्ण जित निकाल्दै अन्तिम आठको यात्रा तय गरेको थियो ।

तर त्यसबेलाका नेयमार र लुइस सुआरेज बार्सिलोनाको टोलीमा रहेका छैनन् । टोलीसँग कप्तान लियोनेल मेस्सी, औसमाने डेम्वेले, जोर्डी अल्वा, पेड्री, सर्जियो बुस्क्वेट्स, फ्रान्की डि जोङ, सर्जिनो डेस्ट, स्यामुइल उम्टिटी, क्लेमेन्ट लेङ्लेट र गोलरक्षक मार्क आन्दर टेर स्टेगनको साथ रहेको छ ।

यि दुई टोलीको पछिल्लो १० भेटमा बार्सिलोना ४ खेलमा विजयी भएको छ । ३ खेल पीएसजीले आफ्नो पक्षमा पार्दा ३ खेल बराबरीमा सकिएको छ ।