काठमाडौं (हाम्रो खेलकुद) – सहिद स्मारक ‘बी’ डिभिजन लिगमा मध्यपुर युथ एसोसिएसनले झम्सिखेल युथ क्लबलाई २–१ ले पराजित गरेको छ ।

सातदोबाटोस्थित एन्फा कम्प्लेक्सको खेल मैदानमा बिहीबार भएको खेलमा मध्यपुरले एक गोलले पछि परेको स्थिति उल्ट्याएर जित हात पारेको हो । मध्यपुरको जितमा कप्तान रोनिस ढेके राजवहाक र धिरज श्रेष्ठले गोल गरे । झम्सिखेलका मनिष खड्काको गोल सान्त्वना बन्यो ।

खेलको छैटौ मिनेटमा मनिष खड्काले गोल गर्दै झम्सिखेललाई १–० को अग्रता दिलाए । मनिष थाडा मगरको क्रसलाई रन्जित चौधरी थारुले हेडमार्फत राम्ररी क्लियर गर्न नसकेको बललाई मनिषले जाली चुमाएका थिए ।

३७औं मिनेटमा रोनिस ढेके राजवहाकले गोल गर्दै खेललाई १–१ गोलको बराबरीमा ल्याए । रोनिसको प्रहारलाई गोलरक्षक सागर सुस्लिङले सामान्य रुपमा लिदा नियन्त्रणमा लिन नसक्दा बलले जाली चुम्न पुगेको थियो । ६७औं मिनेटमा धिरज श्रेष्ठको प्रहार आकासिदा मध्यपुर अग्रता लिनबाट चुक्यो ।

६९औं मिनेटमा मदन स्याङ्तानले पेनाल्टी बक्समा तीन डिफेन्डरलाई बिट गर्दै अघि बढाएको बललाई गोलरक्षक आकाश रानाभाटले नियन्त्रणमा लिए । ७०औं मिनेटमा धिरज श्रेष्ठले अर्काे अवसर खेर फाल्दा मध्यपुर अग्रता लिनबाट चुक्यो ।

७२औं मिनेटमा बिपन श्रेष्ठको पासमा मदन स्याङ्तानले प्रहारलाई गोलरक्षकले नियन्त्रणमा लिन नसक्दा भुवन राईको प्रहार आकासिदा झम्सिखेल बराबरीबाट चुक्यो । इन्ज्युरी समयको थप गरिएको दोस्रो मिनेटमा धिरज श्रेष्ठले गोल गर्दै मध्यपुरलाई २–१ को जित दिलाए । उनले सन्जीव थापामगरका पासमा वान टचमा उत्कृष्ट फिनिस गरेका थिए ।

जितपछि मध्यपुर ११ खेलबाट १६ अंक जोडेर पाँचौ स्थानमा उक्लिएको छ । रानी पोखरी कर्नर टिम (आरसिटी) र लिग विजेता सातदोबाटो युथ क्लबबीचको विजेताले आरसिटी र मध्यपुरको स्थान निर्धारण गर्नेछ । पराजित झम्सिखेलले ११ खेलबाट ६ अंक जोडेर ११औं स्थानमा रहेर लिगको अन्त्य ग¥यो ।