एजेन्सी – पेरिस सेन्ट जर्मेन (पिएसजी) ले अर्को सिजनका लागि योजना बनाउन थालिसकेको छ । यसैबीचमा युभेन्ट्सका सुपर स्टार क्रिस्टियानो रोनाल्डोलाई लिने विषयमा पनि चर्चा सुरु गरेको छ ।

फ्रान्सेली च्याम्पियन टोलीमा नेयमार र केलियन एमबाप्पेका साथमा बार्सिलोनाका सुपर स्टार लियोनल मेस्सीलाई खेलाउने विषयमा पनि चर्चा सुरु गरेको थियो । तर, त्योसँगै अन्य विकल्पका बारेमा पनि पिएसजीले तयारी सुरु गरेको छ ।

मेस्सीलाई लिने पहलसँगै एमबाप्पले क्लब छाड्न सक्ने सम्भावनालाई पनि पिएसजीले मध्यनजर गरेको छ । पिएसजीले केहि वर्षयता सुपरस्टारहरुका साथमा च्याम्पियन्स लिग जित्ने प्रयास गरिरहेको छ । त्यसमा एमबाप्पेले सम्झौता नविकरण कम गर्ने सम्भावना पनि रहेको बताइएको छ ।

फ्रान्सेली सञ्चारमाध्यमका अनुसार पिएसजीले रोनाल्डोलाई विकल्पका रुपमा गम्भिरतापूर्वक हेरिरहेको छ । रोनाल्डोका एजेन्ट जर्ज मेन्डिस र पिएसजीका अध्यक्ष नासिर अल खलिफाबीच निकटको सम्बन्ध रहेको बताइन्छ । पिएसजीका कतारी मालिक खलिफा रोनाल्डोलाई बार्षिक ३१ मिलियन युरो दिन तयार हुन सक्ने अनुमान पनि गरिएको छ । जोसे मारिया मार्टेउ बार्सिलोनाका अध्यक्ष हुँदा मेस्सी आउन सक्ने सम्भावना पिएसजीले देखेको थियो ।

अहिले बार्सिलोनाको वातावरणमा परिवर्तन भएको छ । जोन लार्पोटा बार्सिलोनाको नयाँ अध्यक्षका रुपमा निर्वाचित भइसकेका छन् । जसका कारण मेस्सी बार्सिलोनमै रहने विश्वास पनि गरिएको छ ।

बार्सिलोना प्रशिक्षक रोनाल्ड कोम्यान र मेस्सीलगायत टोलीमा पछिल्ला केहि महिनायता राम्रो समन्वय बनिरहेका कारण पनि पिएसजीले रोनाल्डोका बारेमा सोच्न थालेको अनुमान गरिएको छ ।