काठमाडौं (हाम्रो खेलकुद) – १० दिनपछि घरेलु मैदान दशरथ रंगशालामा एएफसी कपको प्ले अफको पहिलो खेल खेल्ने तयारीमा रहेको विभागीय त्रिभुवन आर्मी क्लबले किर्गिस्तानको यु–२३ टोलीसँगको मैत्रीपुर्ण खेलको पहिलो हाफमा गोलरहित बराबरीमा सकिएको छ ।

दशरथ रंगशालामा आइतबार भएको खेलमा दुवै टोलीले केही अवसर पाएपनि सदुपयोग गर्न सकेनन् । खेलको पहिलो मिनेटमा नै विवेक बस्नेतको क्रसमा नवयुग श्रेष्ठको हेडरलाई गोलरक्षक प्रियाडकिन अर्टेमले मुस्किलले पञ्च गर्दै बचाए । चौथो मिनेटमा नवयुग श्रेष्ठको क्रसलाई गोलरक्षक अर्टेमले सहजै बचाए ।

२३औं मिनेटमा विवेक बस्नेतलाई बाकयातबेक युल सुल्तानविकले लडाएपछि पेनाल्टी बक्सबाहिरको सन्तोष तामाङको हेडरलाई डिफेन्डरले क्लियर गर्दै बचाए । २६औं मिनेटमा एबीलोभ इर्नाजको प्रहार क्रसबारमा लागेर फर्कदा किर्गिस्तान अग्रता लिनबाट चुक्यो ।

पहिलो हाफको इन्ज्युरी समयको थप गरिएको तेस्रो मिनेटमा विवेक बस्नेतको क्रसलाई नवयुग श्रेष्ठ, जर्जप्रिन्स कार्की र टेक बहादुर बुढाथोकीले भेट्न सकेनन् । किर्गिस्तानको युवा टोलीविरुद्ध आर्मीले राष्ट्रिय टोलीको २३ सदस्यीय टोलीमा नपरेका नवयुग श्रेष्ठ, जर्जप्रिन्स कार्की, सन्तोष तामाङ र बिकास खवाससँगै सेसेहाङ आङ्देम्वे, सुमन अर्याल, बिकास तामाङलाई मैदानमा उतारेको छ ।

आर्मीले एफएफसी कपको तयारीस्वरुप किर्गिस्तानको युवा टोलीसँग मैत्रीपुर्ण खेल खेलेको हो । किर्गिस्तानको युवा टोली थ्री नेसन्स कपको लागि नेपाल आएको थियो । राउन्ड रोविन लिग १ बराबरी र १ हारका साथ किर्गिस्तान प्रतियोगिताबाट बाहिरिएको थियो । किर्गिस्तान बंगलादेशसँग १–० ले पराजित हुदा नेपाली राष्ट्रिय टोलीसँग गोलरहित बराबरी खेलेको थियो । आर्मीले २५ बैशाखमा श्रीलंकाको पुलिस क्लबसँग खेल्दैछ ।