एजेन्सी – इंग्लिस प्रिमियर लिगमा लन्डन क्लब आर्सनलले सहज जित दर्ता गर्दा लेस्टर सिटीले वेस्ट ह्याम युनाइटेडसँग हार बेहोरेको छ ।

आर्सनलले रेलिगेसन जोनमा संघर्ष गरिरहेको सेफिल्ड युनाइटेडलाई उसकै मैदानमा ३–० ले पराजित गरेको हो । आर्सनलको जितमा एलेसान्द्रो लाकाजेटले दुई तथा गाव्रियल मार्टिनेलीले एक गोल गरे । पहिलो हाफमा एक तथा दोस्रो हाफमा दुई गोल सम्भव भएको थियो ।

ब्रामल लेन सेफिल्डमा आइतबार राति भएको खेलमा आर्सनलले खेलको ३३औं मिनेटमा एलेसान्द्रे लाकाजेटको गोलबाट अग्रता लिएको थियो । उनले ड्यानियल सेवालसको पासलाई सदुपयोग गरेका थिए ।

७१औं मिनेटमा गाव्रियल मार्टिनेलीले गोल गर्दै आर्सनलको अग्रता दोब्बर पारे । ८५औं मिनेटमा लाकाजेटले थोमस पार्टीको पासमा व्यक्तिगत दोस्रो तथा टोलीका लागि तेस्रो गोल गर्दै आर्सनलाई ३–० को सहज जित दिलाए ।

जितसँगै आर्सनल ३१ खेलबाट ४५ अंक जोडेर नवौं स्थानमा उक्लिएको छ । पराजित सेफिल्ड १४ अंक जोडेर पुछारमा रहेको छ । यो हारले सेफिल्डको रेलिगेसन म्भावना बढेको छ ।

यस्तै प्रिमियर लिगकै अर्काे खेलमा वेस्ट ह्याम युनाइटेडले लेस्टर सिटीलाई ३–२ ले स्तब्ध पारेको छ । वेस्ट ह्यामका जेसे लिङ्गार्डल दुई गोल गर्दा जारोड वोवेनले एक गोल थपे । लेस्टरका केलिचीले दुवै गोल गरेपनि हार टार्न सकेन ।

यो जितपछि वेस्ट ह्याम ३१ खेलबाट ५५ अंक जोडेर चौथो स्थानमा उक्लदा पराजति लेस्टर ५६ अंक जोडेर तेस्रो स्थानमा यथावत रहेको छ ।