एजेन्सी – सात गोलको थ्रीलरमा सेभियाले रोमाञ्चक र नाटकीय जित निकाल्दै स्पेनिस ला लिगाको शीर्ष चारको यात्रालाई बलियो बनाएको छ ।

सोमबार राति भएको खेलमा सेभियाले सेल्टा डि भिगोलाई उसकै मैदानमा ४–३ ले हराएको हो । सुरुवाती अग्रता लिएर पनि त्यसलाई जोगाउन नसक्दा सेभिया पहिलो हाफमा ३–२ ले पछि परेको थियो । दोस्रो हाफमा सेभियाले दुई गोल गर्दै जित निकाल्न सफल भयो ।

एवान्का वलाइडोस भिगोमा सेभियाले खेलको सातौ मिनेटमा जुलेस कोन्डेको गोलबाट अग्रता लिएको थियो । उनले मार्काेस एकुनाको पासमा गोल गरका थिए । २०औं मिनेटमा इगो आसपासले पेनाल्टीमार्फत गोल गर्दै खेललाई १–१ गोलको बराबरीमा ल्याए ।

लगत्तै २३औं मिनेटमा इगो आसपासले डेनिस सुआरेजको पासमा व्यक्तिगत र टोलीका लागि दोस्रो गोल गर्दै सेल्टालाई २–१ ले अघि बढाए । ३५औं मिनेटमा फर्नान्डोले सुसोको पासमा गोल गर्दै सेभियालाई खेलमा फर्काए । ४३औं मिनेटमा ब्राइस मेन्डेजले सुआरेजकै पासमा गोल गरेपछि सेल्टाले पहिलो हाफमा ३–२ को अग्रता लिएको थियो ।

खेलमा पछि परेको सेभियाले दोस्रो हाफमा उत्कृष्ट प्रदर्शन गर्दै दुई गोल गर्दै जित निकाल्न सफल हुदा घरेलु टोलीले त्यसलाई जोगाउन नसक्दा पराजित हुन पुग्यो । ६०औं मिनेटमा इभान राकिटिचले गोल गर्दै खेललाई ३–३ गोलको बराबरीमा ल्याए । ७६औं मिनेटमा एलेसान्द्रो गोमेजले गोल गर्दै सेभियालाई ४–३ को नाटकीय र रोमाञ्चक जित दिलाए ।

जितसँगै सेभियाको शीर्ष चारको सम्भावना बलियो बनेको छ । सेभियाको ३० खेलबाट ६१ अंक पुगेको छ । सेभिया तेस्रो स्थानको बार्सिलोनाभन्दा ४ अंकले पछि रहँदा पाँचौ स्थानको रियल सोसिडाडलाई १४ अंकले पछि पारेको छ । पराजित सेल्टा ३७ अंक जोडेर १०औं स्थानमा रहेको छ ।