काठमाडौं (हाम्रो खेलकुद) – नेपाल एएफसी फुटसल एसियन कप क्वालिफायरको समूह ‘बी’ मा परेको छ । बिहीबार निकालिएको ‘ड्र’ मा सेन्ट्रल तथा साउथ जोनमा नेपाल उज्वेकिस्तान, ताजिकिस्तान र अफगानिस्तान रहेको समूह ‘बी’ मा परेको हो ।

समूह ‘ए’ मा इरान, आयोजक किर्गिस्तान, तुर्केमिनिस्तान र माल्दिभ्स परेका छन् । प्रतियोगिता अन्तर्गत साउथ तथा सेन्ट्रल जोनको दुवै समूहको शीर्ष दुई स्थानमा रहने टोलीले सन् २०२२ मा कुवेतमा हुने एएफसी फुटसल एसियन कपमा स्थान बनाउनेछन् । यस क्षेत्रबाट कुल ४ टोली छनोट हुँदा पश्चिमबाट ५, पुर्वबाट ३ तथा आसीआन क्षेत्रबाट ३ टोली छनोट हुनेछन् । आयोजक कुवेत अन्तिम चरणका लागि छनोट भइसकेको छ ।

अखिल नेपाल फुटबल संघ (एन्फा) अन्तर्गत फुटसल कमिटिले गत सोमबार एएफसी फुटसल एसियन कप क्वालिफायरका लागि ३२ खेलाडी सम्मिलित प्रारम्भिक टोली घोषणा गरिसकेको छ । फुटसल टोलीमा मुख्य प्रशिक्षक गौरव बस्नेतले सोमबार प्रारम्भिक टोलीमा ३२ खेलाडीलाई समेटेका हुन् । प्रशिक्षक बस्नेतले गत सेप्टेम्वर १८ देखि अक्टोवर ८ सम्म पोखरामा भएको ‘ए’ डिभिजन राष्ट्रिय लिग र प्रदेश छनोटमा गरेको प्रदर्शनको आधारमा खेलाडी छनोट गरिएको बताएका छन् । उनले प्रदेश छनोटको आधारमा पनि खेलाडी छनोट गरेका थिए ।

बन्द प्रशिक्षण ७ जनवरीदेखि काठमाडौंमा सुरु हुनेछ । पहिलो चरणपछि प्रशिक्षण पोखरामा पनि हुनेछ । एएफसी फुटसल एसियन कप क्वालिफायर किर्गिस्तानमा १ देखि १५ अप्रिलमा हुँदैछ ।

बन्द प्रशिक्षणमा डाकिएका खेलाडी

गोलरक्षक – अनिष श्रेष्ठ, विश्वास पौडेल, लक्ष्मण थापा, सचिन श्रेष्ठ, सन्जिव तामाङ र सुमित कुमार आले

फिक्सो – अरुज सिंह, विजय श्रेष्ठ, विक्कु तामाङ र सरोज तामाङ

पिभोट – अविनाश तामाङ, विक्रान्त नरसिंहराना, धिरज जोशी, हेमन्त गुरुङ, खिमराज गुरुङ, किहोर गुरुङ, मिलन राई, प्रवेश जोशी, रिवोस मास्के र सुशान श्रेष्ठ

एला – आदिल हामिद, अमित लामा, जेनिस प्रजापति, किरण चौधरी, क्रिजल श्रेष्ठ, मणि कुमार लामा, मनोज गुरुङ, रन्जित गुरुङ, रोशन छन्तयाल, सुमित श्रेष्ठ, सुरज गुरुङ र उर्केन शेर्पा