काठमाडौं (हाम्रो खेलकुद) – सामाजिक उद्यम संस्था ‘युथ लेजेन्ड नेपाल’ले यही शनिबार राजधानीमा महिला फुटसलको आयोजना गर्ने प्रेस विज्ञप्तिमार्फत सार्वजनिक गरेको छ ।

विगत करिब चार वर्षदेखि युवा सशक्तिकरणको क्षेत्रमा कार्यरत ‘युथ लेजेन्ड नेपाल’ले चैत्र १७ गते राजधानीमा ‘फ्लाइटेक’ महिला फुटसल प्रतियोगिताको आयोजना गर्दै छ । विभिन्न क्षेत्रका महिला समावेश हुने यस प्रतियोगिताले महिला सशक्तिकरण र लैंगिक समानतालाई मूलधारमा ल्याउने उद्देश्य बोकेको छ ।

प्रतियोगिताका समूह चरणका साथै, क्वाटरफाइनल, सेमिफाइनल र फाइनल खेल शनिबार नै सामाखुशी फुटसलमा खेलिनेछन् । यस प्रतियोगितालाई फ्लाइटेक इन्टरनेसनलले मुख्य प्रायोजन गरेको छ भने रेड बुलले सहप्रायोजन गरेको छ । प्रतियोगिताका विजेता तथा उपविजेताले ट्रफीसहित मेडल पाउने छन् भने उत्कृष्ट खेलाडी र सर्वाधिक गोलकर्तालाई पनि ट्रफी प्रदान गरिनेछ ।

“प्रतिस्पर्धी कतिपय महिला खेलाडीहरु पहिलो पटक जसो फुटसल खेल्दै छन् । फुटसल पुरुषको मात्र खेल हो भन्ने अवधारणाको पनि हामी अन्त्य गर्न चाहन्छौं ,” इभेन्ट निर्देशक मोहन घिमिरेले बताए । यस प्रतियोगितामार्फत प्रतिस्पर्धी महिलाहरुमा नेतृत्व क्षमताको पनि उजागर हुने आफूले विश्वास राखेको घिमिरेले जानकारी दिए ।