दिपक न्यौपाने, बुटवल
एनएमबी बैंकले चौथो एमजी कप कर्पोरेट फुटसल प्रतियोगिता–२०७५को उपाधि जितेको छ । रोटरी क्लब अफ रुपन्देही र रोट्रयाक्ट क्लब अफ रुपन्देहीको संयुक्त आयोजना तथा युनिक फुटसलको प्राविधिक सहयोगमा शनिबार सम्पन्न खेलमा फाइनलमा मेगा बैंकलाई पराजित गर्दै एनएमबी बैंकले उपाधि जितेको हो ।
उपाधिसँगै एनएमबीले नगद १५ हजार सहित प्रमाणपत्र,शिल्ड र मेडल प्राप्त गरेको छ भने उपविजेता बन्न सफल मेगा बैंकले नगद रु १० हजार सहित प्रमाणपत्र,शिल्ड र मेडल प्राप्त गरेको रोटरीका सदस्थ तथा प्रतियोगिताका संयोजक गौतम भुषालले जानकारी गराए ।
यस क्षेत्रमा रहेका वित्तिय तथा व्यवसायिक संघसंस्था बीच खेलको माध्यमबाट भेटघाट, सदभाव र सम्बन्ध सुदृढ गर्ने उद्देश्यका साथ आयोजना गरिएको प्रतियोगिता सौहार्द रुपमा सफल भएको रोटरी क्लब अफ रुपन्देहीका अध्यक्ष हरि प्रसाद न्यौपानेले बताए । प्रतियोगितामा स्थानीय दश समूहको सहभागिता रहेको रोट्रयाक्ट क्लब अफ रुपन्देहीका सदस्य तथा प्रतियोगिताका अर्का संयोजक राजेश खरेलले जानकारी गराए ।
सधैं व्यापार,व्यवसायमा र पेशागत कार्यमा व्यस्त रहने व्यक्तिहरुका लागि शारिरिक, स्वास्थ्य, मनोरञ्जनसँगै आपसमा सदभाव बढाउनका लागि आयोजना गरिएको फुटसल प्रतियोगिता उत्साहनक सहभागितामा सम्पन्न भएको रोट्रयाक्ट क्लब अफ रुपन्देहीका अध्यक्ष सुरेश भण्डारीले बताए ।
यूरोपियन ब्राण्ड एम जी कार मुख्य प्रायोजक र पाठक सिमेण्ट सह–प्रायोजक रहेको प्रतियोगिता तिलोत्तमा ५ मणिग्राम स्थित नयाँ एवम् आधुनिक यूनिक फुटसल मैदानमा सम्पन्न भएको हो । हालै निर्माण सम्पन्न सो मैदानको शनिबार नै समुद्घाटन गरिएको हो । बुटवल ,भैरहवा र तिलोत्तमा फुटसलप्रेमीहरुलाई लक्षित गरी करिब एक करोडमा यूनिक फुटसलको स्थापना गरेको प्रोपराइटर रमेश डुम्रेले बताए ।
प्रतियोगितामा तिलोत्तमा नगरपालिका, तिलोत्तमा उद्योग वाणिज्य संघ र तिलोत्तमा व्यापार संघको विशेष सहयोग रहेको प्रतियोगिताका संयोजक भुषालले बताए ।
