काठमाडौं (हाम्रो खेलकुद) – दोस्रो संस्करणको टफिचु जुनियर च्याम्पियन्ससिप कप फुटसल प्रतियोगिता बिहीबारदेखि आयोजना हुने भएको छ ।

ग्रासरुट फुटसल एकेडेमीले सुर्य नेपाल प्राइभेट लिमिटेडको कन्फेक्सनरी ब्राण्ड टफिचुको प्रायोजनमा हुने प्रतियोगिता जुन २० बाट २३ जुनसम्म विभिन्न पाँच फुटसल भेन्युमा सञ्चालन हुनेछ । तीन विधामा हुने प्रतियोगितामा विभिन्न ८७ स्कुलको सहभागिता रहने आयोजकले जनाएको छ । तीन विधामा यु–११, यु–१३ र यु–१५ विधामा प्रतिस्पर्धा हुनेछ । च्याम्पियन्स कप ग्रासरुट फुटसल, शान्तिनगर फुटसल, सामाखुशी फुटसल, नेसनल स्पोर्टस् सेन्टर र बिजी ब्रदर्श फुटसलमा हुनेछ ।

यु–११ यसपटक थप गरिएको विधा हो । गतवर्ष यु–१२ र यु–१४ मा प्रतिस्पर्धा भएको थियो ।
यु–११ बाहेक बाँकी दुई विधा यु–१३ र यु–१५ का लागि पाँच भेन्युबाट शीर्षस्थान हात पार्ने टोलीले सेमिफाइनलमा स्थान बनाउनेछन् । सेमिफाइनलमा ५ टोलीलाई दुई समूहमा विभाजन गरिनेछ । शीर्ष हुने टोलीले फाइनलमा स्थान बनाउनेछन् ।

यस प्रतियोगिताको लागि आयोजकले राष्ट्रिय फुटबल टोलीका पहिलो रोजाईका गोलरक्षक किरण कुमार लिम्बुलाई ब्राण्ड एम्वासडरमा नियुक्त गरेको छ । उनले प्रतियोगिता भर यस फुटसललाई नियाल्नेछन् । गत वर्ष यु–१२ मा रातो बंगला र यु–१४ मा शिवपुरी स्कुल विजेता बनेको थियो ।