काठमाडौं (हाम्रो खेलकुद) – लिटिल एन्जेल्स स्कुल र जेम्स स्कुल राजधानीमा बुधबारबाट शुरु भएको दोस्रो संस्करणको टफिचु जुनियर च्याम्पियन्ससिप कप फुटसल प्रतियोगिता अन्तरगतको यु–११ तर्फ सेमिफाइनलमा प्रवेश गरेका छन् ।
च्यासलस्थित नेसनल स्पोर्टस् सेन्टरमा बुधबार भएको क्वाटरफाइनलमा एल एले इपिएसलाई ३–१ ले पराजित गर्दै अन्तिम चारमा स्थान बनाउन सफल भएको हो । अर्काे क्वाटरफाइनलमा जेम्सले ज्ञान निकेतनमाथि ५–१ को फराकिलो जित निकाल्यो । क्वाटरफाइनलका दुई खेल बिहीबार हुने प्रतियोगिताको च्यासल भेन्यु संयोजक हरि लामाले बताएका छन् ।
बिहीबार हुने क्वाटरफाइनलमा रातो बंगला ‘ए’ पाठशाला तथा दोस्रो क्वाटरफाइनलमा रातो बंगला ‘बी’ र एस स्कुलबीच खेल हुनेछ ।
यु–११ तर्फ १२ टोलीको सहभागिता रहेको थियो । सहभागी टोलीलाई ४ समूहमा विभाजन गरिएको थियो । हरेक समुहका शीर्ष दुई टोलीले क्वाटरफाइनलमा स्थान बनाएका थिए । यु–११ यसवर्ष थपिएको नयाँ विधा हो ।
बिहीबारदेखि नै यु–१३ र यु–१५ विधामा प्रतिस्पर्धा हुनेछ । च्याम्पियन्स कप ग्रासरुट फुटसल, शान्तिनगर फुटसल, सामाखुशी फुटसल, नेसनल स्पोर्टस् सेन्टर र बिजी ब्रदर्श फुटसलमा हुनेछ । सुर्य नेपाल प्राइभेट लिमिटेडग्रासरुट फुटसल एकेडेमीले सुर्य नेपाल प्राइभेट लिमिटेडको कन्फेक्सनरी ब्राण्ड टफिचुको प्रायोजनमा प्रतियोगिता शुरु भएको हो ।
