काठमाडौं (हाम्रो खेलकुद) – नेपाल फिजियोथेरापी संघ (नेप्टा) ले विश्व फिजियोथेरापी दिवसको अवसरमा आयोजना गरेको दोस्रो नेप्टा अन्तर फिजियो फुटसल प्रतियोगिताको उपाधि फास्ट ट्वीचले जितेको छ ।

उपाधिका लागि फास्ट ट्वीचले फाइनलमा पीएनएफ च्याप्टर २ लाई २-१ ले पराजित गरेको थियो । पीएनएफका उमेश अधिकारी सर्वोत्कृष्ट खेलाडी घोषित भए । उत्कृष्ट गोलरक्षक मणिपाल ब्वाइजका अनमोल राई घोषित भए । पीएनएफ च्याप्टर २ ले फेयर प्ले उपाधि प्राप्त गर्यो । विजयी खेलाडी तथा टोलीलाई नेपाली राष्ट्रिय फुटबल टोलीका कप्तान विराज महर्जनले पुरस्कृत गरे ।

त्यसअघि पिटी म्याजेस्टिक र मणिपाल ब्वाइजको चुनौती सेमिफाइनलमा नै समाप्त भएको थियो । कुल ८ टोली सहभागी प्रतियोगितामा दुई समूहमा ४-४ टोली रहेका थिए । शीर्ष २ टोलीले सेमिफाइनलमा स्थान पक्का गरेका थिए ।अर्थोप्लास्ट रातो र निलो, सुस्वास्थ्य अल्ट्रासोनिक्स तथा रिभाइभले समूह चरण पार गर्न सकेनन् ।

प्रतियोगिताको उद्घाटन अखिल नेपाल फुटबल संघ (एन्फा) का अध्यक्ष कर्माछिरिङ शेर्पाले गरेका थिए । उनले नेप्टा अध्यक्ष लक्ष्मण अधिकारीलाई पेनाल्टी प्रहार गर्दै विधिवत उद्घाटन गरेका थिए । उद्घाटन समारोहमा नेप्टाको कार्यकारी समिति र ह्युम्यानिटि इन्क्लुजनबीच मैत्रीपूर्ण खेल भएको थियो । उक्त खेल नेप्टा टोलीले जितेको थियो ।

खेलकुद पनि फिजियोथेरापीको महत्त्वपूर्ण विधा रहेकाले खेलकुदकै माध्यमबाट नेपालभर रहेका फिजियोथेरापिस्टहरुलाई एकतृत गरेर विश्व फिजियोथेरापी दिवस मनाउन प्रतियोगिता आयोजना गरेको नेप्टा महासचिव समिद कतिला श्रेष्ठले जानकारी दिए । गतवर्ष पनि नेप्टाले यो प्रतियोगिता आयोजना गरेको थियो ।