काठमाडौं (हाम्रो खेलकुद) – ताम्रकार समाजको आयोजनामा हुने द ब्रिटीस कलेज चौथो ताम्रकार फूटसल प्रतियोगिताका २०१९ को तयारी पुरा भएको छ ।

आयोजकले असोज ४ र ११ गते शनिबार हुने प्रतियोगिताका लागि ट्रफी, जर्सी र खेल तालिका आइतबार एक पत्रकार सम्मेलन गर्दै सार्वजनिक गरेको छ । प्रतियोगितामा ८ टोलीको सहभागिता रहनेछ । प्रतियोगितामा समाजका ६० भन्दा बढी खेलाडीहरुको सहभागिता रहने ताम्रकार समाजका अध्यक्ष रविन्द्र राज ताम्रकारले जानकारी दिए ।

प्रतियोगिताको कुल अनुमानीत खर्च साढे चार लाख रहेको छ । जसको  १ लाख ६० हजार मुख्य प्रायोजक द ब्रिटीस कलेजले प्रदान गर्नेछ । प्रतियोगितामा वि.के. सुन चाँदी पसल, भैरवनाथ आईरण इण्डष्ट्री, दिल ह्याण्डीक्राफ्ट करुणामय मेटल क्राफ्ट, ताम्र मेटल वर्क, जेन्ज ग्यारेज, ओरियन इलेक्ट्रिकल, टेकम्याकस टाइगर गरि ८ टोलीको नामकारण गरिएको छ । करुणामय मेटल क्राफ्ट गत वर्षको च्याम्पियन टोली हो । प्रतियोगिताको सबै खेल सानेपा स्थित फिल्ड फुटसल ग्राउण्ड होममा हुने छ ।

विजेता र उप विजेताले आकर्षक ट्रफी र मेडलको साथै नगद पुरस्कार पाउने ताम्रकार समाजले जनाएको छ । तर नगद रकम बारे भने आयोजकले खुलाउन चाहेन । अध्यक्ष रविन्द्र राज ताम्रकारले यस फूटसलले समाजमा भाईचारा अभिवृद्धि गर्नुको साथै समाजमा सकारात्मक परिवर्तनको संदेश जाने बताए ।