काठमाडौं (हाम्रो खेलकुद)– द ब्रिटीस कलेज चौथो ताम्रकार फूटसल प्रतियोगिताका २०१९ को उपाधि भैरवनाथ आईरण इण्डष्ट्रीले जितेको छ ।

शनिबार सानेपास्थित फिल्ड फुटसलमा भएको प्रतियोगिताको फाइनलमा बि.के सुन चाँदी पसललाई १-० ले पराजित गर्दै उपाधि हात पारेको हो । प्रतियोगिताको विजेता भैरवनाथ र उपविजेता बि.केले क्रमश २० हजार र १० हजार रुपैयाँसहित आकर्षक ट्रफी र मेडल प्राप्त गरे । दुवै टोलीले पुरस्कार स्वरुप प्राप्त रकम समाजको ज्येष्ठ नागरिक कोषमा प्रदान गरे ।

त्यसअघि पहिलो सेमिफाइनलमा बि.के ले करुणामय मेटल क्राफ्टलाई टाइब्रेकरमा २-१ ले पराजित गर्दै फाइनलमा पुगेको थियो । निर्धारित समय गोलरहित बराबर भएपछि पेनाल्टी सुटआउटमा पुगेको थियो । त्यस्तै दोस्रो सेमिफाइनलमा भैरभनाथले टेकम्याकस टाइगरलाई १-० गोल अन्तरले पराजित गर्दै फाइनलमा पुगेको थियो ।

यू-१४ उमेर समुहमा ड्रागन ह्याण्डीक्राफ्टले सिटी ह्याण्डीक्राफ्टलाई २-० ले पराजित गर्दै उपाधि जित्यो । त्यसअघि सेमिफाइनलमा ड्रागनले युश्रा मेटल क्राफ्टलाई ४-१ तथा सिटीले एनआर ह्याण्डीक्राफ्टलाई ३-० ले हराएको थियो । अन्य मैत्रीपूर्ण खेलमा ताम्रकार समाजले ब्रिटिस कलेजलाई ५-२ ले हरायो । महिलातर्फ टिम पहेंलोले टिम ओरेन्जमाथि २-१ को जित दर्ता गर्यो । भेट्रानतर्फ टिम एले टिम बीमाथि ५-३ को जित दर्ता गर्यो ।

प्रतियोगितामा बि.केका दीप बाराही सर्वोउत्कृष्ट खेलाडी घोषित भए । त्यस्तै भैरवनाथका युमन ताम्रकार उत्कृष्ट गोलकिपर र आशिष ताम्रकार उत्कृष्ट प्रशिक्षक घोषित भए । यू-१४ उमेर समूहमा सिटी ह्याण्डीक्राफ्टका रेहन बाराही उत्कृष्ट चुनिए । सर्वाधिक गोलकर्तामा भैरवनाथका आशिष ताम्रकारसँगै दिल ह्याण्डीक्राफ्टक लेउसान ताम्रकार र दिनेश ताम्रकारले ४-४ गोल गरे ।

विजयी खेलाडी तथा टोलीलाई प्रमुख अतिथि नेपाल प्रहरीका डीआईजी पिताम्बर अधिकारी, द ब्रिटिस कलेजका प्रिन्सिपल जो फोस्टर एलिस तथा ताम्रकार समाजका अध्यक्ष रविन्द्रराज ताम्रकार लगायतले पुरस्कृत गरे ।

ताम्रकार समाजको आयोजनामा भएको यस प्रतियोगितामा बि.के.सुन चाँदी पसल, भैरवनाथ आईरण इण्डष्ट्री, दिल ह्याण्डीक्राफ्ट, करुणामय मेटल क्राफ्ट, ताम्र मेटल वर्क, जेन्ज ग्यारेज, ओरियन इलेक्ट्रिकल,टेकम्याकस टाइगर रहेका थिए । प्रतियोगिताको मुख्य प्रायोजक द ब्रिटीस कलेज रहेको थियो ।