काठमाडौं (हाम्रो खेलकुद)– महिला प्रिमियर लिग (एमपिएल) फुटसलको तेस्रो संस्करण शनिबार सुरु हुने भएको छ । आयोजक दि वि युनाइटेडले शुक्रबार राजधानीमा पत्रकार सम्मेलनको आयोजना गर्दै प्रतियोगिताको शनिबार सुरु भएर छ साता (फागुन १० गते) सम्म चल्ने जानकारी गराइएको छ ।

लिगका खेलहरु खेल हरेक साताको शनिबार ग्रासरुट रिक्रिएसन सेन्टर, मन्डिखाटार र बालुवाटारको एक्ससेल फुटसलमा हुने प्रतियोगिता व्यवस्थापक सिलिका शाक्यले पत्रकार सम्मेलनमा जानकारी दिइन् । उनका अनुसार लिगमा ८ टोलीले प्रतिस्पर्धा गर्नेछन् । लिगमा एबिसी फुटसल, ढुकु फुटसल, बार्सा नेपाल, एमयुएफसी फुटसल, कुमारी फुटसल, लाकुर फुटसल, फुटसल एरेना र दि माइथी महिलाज्ले प्रतिस्पर्धा गर्नेछन् ।

८ टोलीले एक अर्कासँग खेल्नेछ । बढी अंक जोड्ने टोली लिग च्याम्पियन बन्नेछ । विजेतालाई नगद पुरस्कार नभई आकर्षक पुरस्कार प्रदान गरिने आयोजकले जनाएको छ । लिगलाई युरोपियन युनियनले मुख्य प्रायोजन गरेको छ ।

लिगका लागि टिमको अवस्था हेरेर टोली छनोट गरिएको आयोजकले जनाएको छ । हरेक टिमा १०–१० जना खेलाडी रहनेछन् । लिगका लागि प्रशिक्षकहरु महिला नै राखिएको र रेफ्रीहरु पनि महिला नै राख्ने प्रयास गरिने आयोजकको योजना छ ।