काठमाडौं (हाम्रो खेलकुद)- कुमारी फुटसलले तेस्रो महिला प्रिमियर फुटसल लिगमा अपराजित यात्रालाई निरन्तरता दिदा ढुकु फुटसलले तेस्रो राउन्डमा फराकिलो जित दर्ता गरेको छ । मण्डिखाटारस्थित ग्रासरुट रिक्रिएसन सेन्टर भएको तेस्रो संस्करणको महिला प्रिमियर लिग फुटसल अन्तरगत दोस्रो साताको खेलमा कुमारी फुटसलले बार्सा नेपाललाई ३–२ ले पराजित गरेको हो ।

कुमारी फुटसल लिगमा अपराजित एक्लो टोली हो । ढुकुले दि माइथी महिलाजलाई १५–२ को भारी अन्तरले पराजित गरेको हो । ढुकुको फराकिलो जितमा पेमा छोदेन एक्लैले ५ गोल गरिन् । यस्तै फुटसल एरिनाले लाखुर फुटसललाई ३–१, तथा एबिसीले एमयुएफसी नेपाली गल्सलाई ४–२ ले स्तब्ध पारे ।

लिगको तेस्रो राउन्डको खेल सकिदा अपराजित रहेको कुमारीले ३ खेलबाट ९ अंक जोड्दै शीर्षस्थानमा रहेको छ । ढुकु ७ अंक जोडेर दोस्रो स्थानमा छ । लाखुर, फुटसल एरिना र एबीसीको पनि समान ७ अंक छ । एमयुएफसी र बार्सा नेपालको समान ५ अंक छ । दि माइथी महिलाज् ३ अंक जोडेर पुछारमा छ ।

युरोपियन युनियनको मुख्य प्रायोजनमा ६ सातासम्म सञ्चालन हुने प्रतियोगिता हरेक साताको शनिबार मात्र खेल हुनेछ । महिलाहरूलाई खेलमा सक्रियता बढाउने उद्देश्यका साथ सञ्चालन गरिएको हो । ८ टोलीको सहभागिता रहेको प्रतियोगिताका विजेतालाई प्रायोजकले नेपालमा नै उत्पादन भएका सामग्री पुरस्कार प्रदान गर्नेछ ।