क्याप टिम र प्रोजेक्ट डीलाइटलाई एनआइसी एसिया फुटसलको उपाधि

काठमाडौं (हाम्रो खेलकुद) – एनआइसी एसिया फुटसल कपमा महिलातर्फ क्याप टिम र पुरुषतर्फ प्रोजेक्ट डीलाइट च्याम्पियन बनेका छन् ।

धन्यन्तरीस्थित फुटसल कोर्टमा शनिबार भएको एकदिने प्रतियोगितामा पुरुषतर्फ २४ र महिलातर्फ ८ टोलीको सहभागिता रहेको थियो । महिलातर्फ फाइनलमा क्यापले टिम डीएनएलाई १-० ले पराजित गर्दै उपाधि जित्यो । विजेता टोलीकी स्मृति खत्री उत्कृष्ट खेलाडी बन्दा पुजा कुँवर उत्कृष्ट गोलरक्षक घोषित भइन् । फाइनलमा पराजित डीएनएकी रुविना थापाले ४ गोलसहित सर्वाधिक गोलकर्ताको उपाधि जितिन् ।

पुरुषतर्फ फाइनलमा प्रोजेक्ट डीलाइटले क्याप टिमलाई टाइब्रेकरमा पराजित गरेको थियो । निकै प्रतिस्पर्धात्मक फाइनलको निर्धारित समय २-२ को बराबरीमा सकिएको थियो । प्रोजेक्ट डीलाइटले टाइब्रेकरमा ३-२ को अन्तरले जित हात पर्दै उपाधि कब्जा गर्यो । विधागत उत्कृष्टतर्फ विजयी टोलीको वर्चस्व रहयो । उत्कृष्ट खेलाडीमा ठाकुर श्रेष्ठ तथा उत्कृष्ट गोलरक्षक अनिल ढकाल भए । प्रतियोगिता अवधिभर ७ गोल गर्दै सर्वाधिक गोलकर्ता पनि विजयी टोलीका रितेश अधिकारी नै भए ।

विजयी टोली र खेलाडीलाई बैंकका प्रमुख कार्यकारी अधिकृत रोशन कुमार न्यौपाने र राष्ट्रिय फुटबल टोलीका पूर्वकप्तान अनिल गुरुङले पुरस्कृत गरे ।