पोखरा (हाम्रो खेलकुद) – स्पोर्ट्स क्यासल पोखरा ‘ए’ डिभिजन राष्ट्रिय फुटसल लिगको शीर्षस्थानमा उक्लिदा प्रभातफेरी युथ क्लब काठमाडौंले पहिलो जित दर्ता गरेको छ । पोखरास्थित बहुउद्देश्यीय कभर्डहलमा सोमबार भएको खेलमा स्पोर्ट्स क्यासलले स्काई गोल्स काठमाडौं ८–३ को फराकिलो अन्तरले पराजित गर्दै शीर्षस्थानमा उक्लिएको हो ।

स्पोर्ट्स क्यासलको जितमा खिमराज गुरुङ र सुमित श्रेष्ठले समान दुई गोल गर्दा विसन गुरुङ, दिपेश घले, विजय गुरुङ र किशोर गुरुङले समान एक गोल गरे । स्काई गोल्सका मनोज राई र रोशन अधिकारीले गोल गर्दा एक गोल उपहार पाएको थियो । जितपछि अपराजित रहेको स्पोर्ट्स क्यासलको ५ खेलबाट १३ अं पुगेको छ । पराजित स्काई गोल्स ५ खेलबाट ६ अंक जोडेर छैटौं स्थानमा रहेको छ ।

यस्तै प्रभातफेरीले लिगमा पहिलो जित दर्ता गर्दा लुम्विनी फुटसललाई ६–१ ले पराजित गरेको छ । प्रभातफेरीको जितमा धिरज जोशी, सन्त लाल गुरुङ, बिशाल सारु मगर, श्रीजेश पुरी, आशिष दंगाल र सुविल श्रेष्ठले गोल गरे । लुम्विनीका रुपेन बराइलीले एक गोल फर्काए । सुरुवाती तीन खेलमा हार बेहोरेको प्रभातफेरीले चौथो खेलमा ढुकु फुटसल हवसँग बराबरी खेल्दै अंक जोडेको थियो । जितपछि प्रभातफेरीको ५ खेलबाट ४ अंक पुगेको छ । पराजित लुम्विनीको पनि ४ अंक नै छ ।

यस्तै लिगको अर्काे खेलमा फुटसल फाइभले झरना स्पोर्ट्स क्लबलाई ९–५ ले पराजित गरेको छ । फुटसल फाइभको जितमा कप्तान सन्दीप कार्कीले ह्याट्रिकसहित चार गोल गर्दा रन्जित तामाङले दुई गोल गरे । सुजन खड्का, निरभ खड्का र विश्वजित राईले समान एक गोल गरे । झरनाका नारायण थापामगरले तीन तथा गंगा गुरुङले दुई गोल गरेपनि हार टार्न सकेन । जितपछि फुटसल फाइभ ५ खेलबाट ८ अंक जोडेर पाँचौ स्थानमा उक्लिएको छ । पराजित झरनाले अंक जोड्न सकेको छैन ।

लिगमा मंगलबार दुई खेल हुनेछ । ढुकु फुटसल हव र दि राइजिङ क्लब धरान तथा सविन मेमोरियलबीच प्रतिस्पर्धा हुनेछ । लिगमा सहभागी १० टोलीले एकल राउन्ड रोविन लिगबाट शीर्ष चार टोलीले प्ले अफमा स्थान बनाउनेछन् । पहिलो प्लेअफको विजेताले फाइनलमा स्थान बनाउने छ । तेस्रो र चौथो हुने टोलीबीच दोस्रो प्लेअफमा प्रतिस्पर्धा हुनेछ ।

एलिमिनेटरमा पहिलो प्लेअफमा पराजित हुने टोली र दोस्रो प्लेअफको विजेताले फाइनल प्रवेशका लागि खेल्नेछन् । लिगको विजेताले १० लाख रुपैयाँ पाउनेछ भने उपविजेताले ५ लाख रुपैयाँ पाउनेछ । लिगको विंगर (आला–पिभोट), डिफेन्डर (फिक्सो), उदियमान खेलाडी, गोलरक्षक र प्रशिक्षकले समान २५ हजार पाउनेछन् ।