विजय नेपाली, पोखरा

राष्ट्रिय ए डिभिजन फुटसल लिग अन्तर्गत लिग चरणको अन्तिम खेलमा मंगलबार घरेलु टोली सविन मेमोरियलको लागि निर्णायक दिन थियो । पोखराको स्थानीय टोली सविन मेमोरियललाई प्लेअफ पुग्नका लागि शंखमुल फुटसलमाथि जित हासिल गर्नुको विकल्प थिएन । यस्तोमा टोलीका मुख्य फरवार्ड अभिनाष तामाङ नहुँदा टोली यसै दबाबमा परिसकेको थियो ।

प्लेअफमा स्थान पक्का गरिसकेको शंखमुल आफैं पनि क्वालिफायरको दौडमा थियो । अन्तिम खेलमा सविन मेमोरियलको जितमा नायक बने मनिष क्षेत्री । मनिषले म्यान अफ द म्याच प्रदर्शन गर्दै सविन मेमोरियलको प्लेअफ यात्रा पक्का गरे । मैदानमा विपक्षीलाई नचाउने यिनै मनिषको पिडा भने बेग्लै छ । खुट्टामा भरपुर क्षमता बोकेका उनले आफ्नो साइजको जुत्ता नपाउँदा अझै स्तरअनुसार प्रदर्शन गर्न सकिरहेका छैनन् ।

सविन मेमोरियलका लागि ५ नम्बर जर्सीमा पातलो ज्यान लिँदै विपक्षी छक्याउने खेलाडी हुन् मनिष । आर्टिफिसियल मैदानमा खेल्दा त बल्ल बच्चाको साइजको जुत्ता लगाएर खेल्ने उनले अधिकारिक फुटसल कोर्टमा खेल्दा आफ्नो साइजको जुत्ता नै पाएनन् । तरपनि उनले केहि ठूलो जुत्ता लगाएरै खेलिरहे ।

मनिष गोलका लागि पास दिनमात्र नभई आफैं गोल गर्न पनि माहिर खेलाडी हुन् । तर, मंगलबार भने स्थिति फरक थियो । आफ्नो जुत्ताकै कारण सोचे जस्तो प्रदर्शन गर्न नसकेका मनिषलाई अघिल्लो खेलहरुमा झैं उनलाई गोल मिस गर्ने कुर्न छुट थिएन । अझ सविनका मुख्य गोलकर्ता अभिनाष घाइते हुदाँ उनमा जिम्मेवारी पनि थपिएको थियो ।

एकातिर जुत्ताको समस्या अर्कातिर लिगको बलियो मध्येको टिमविरुद्ध जित्नैपर्ने दबाब । तर, उनले हार मानेनन् । जुत्ताभित्र तलुवा थपेरै भएपनि उनले खेल खेले । यसअघि ढुकु फुटसल संग खेल्दापनि त्यसरीनै तलुवा थप्दा उनको जुत्ता खुकुलो भएकाले फुस्किएको थियो । मंगलबारको खेलमा त्यहि खुकुलो जुत्ताको गोलमा उनको टोलीले खेल जित्न आशा जिवित राख्यो ।

मनिषले खेलको २४ औं मिनेटमा टिमका लागि दोस्रो गोल गरेका थिए । पहिलो गोल भने समिर प्रधानले २० औं मिनेटमा फ्रिकिकमा गरेका थिए । दोस्रो हाफको २५ औं मिनेटमा पुग्दा २–१ को स्थितिमा थियो । ३४ औं मिनेटमा मनिषले बल पाए तर, उनले त्यहाँ आफुले प्रहार गर्दा जुत्ता ठुलो भएकाले जेपनि हुनसक्ने भन्दै साथिलाई पास दिए । उनले लिएको त्यो निर्णयले सविनको प्लेअफको सम्भावना जिवित राख्यो । उनको पासमा सुनिल विकले गोल गरे ।

अन्ततः ४० औं मिनेटमा रेफ्रीले अन्तिम सिठि बजाएपछि मनिष भावुक हुँदै फुटसल कोर्टमा घोप्टिए । उनको टोली ३-१ ले विजयी भयो । उनै मनिष खेलको म्यान अफ दि म्याच समेत घोषित भए ।

‘मेरो साइजको फुटसल बुट नै नपाइने । अर्को सानो सानो गेडी भएको बुट लगाएर खेल्न यहाँ नपाउने निकै समस्या भएको छ,’ उनले सुनाए,‘पसलमा जादाँ बेबि साइजको जुत्ता आउँदैन भाइ भन्यो । टिममा सबैको आफ्नो साइजको जुत्ता छ मेरो मात्रै छैन ।’

‘पहिला पनि तलुवा थपेर खेलेको झन् ठूलो भयो । तर आज मलाइ टिमका लागि केहि गर्नपर्ने थियो,’ मनिषले भने ।

उता सविनका मुख्य प्रशिक्षक राजेन्द्र तामाङले मनिष अघिल्लो खेलहरुमा हौसला गुमाएको बताए । ‘हामीलाई कुनैपनि हालतमा जित्न पर्ने थियो । मनिषको अगाडिको खेलहरुमा के कारण हो प्रदर्शन एकनासको थिएन । तर, आज राम्रो प्रदर्शन भयो,’ उनले भने,‘खेलाडीलाई आज मैले फुटबलको कुरा सुनाएर मोटिभेट गरे । मणि लामा देखेर उनीहरुको मनोबल केहि खस्केको थियो । को कस्तो भन्नेले फरक पार्दैन तिमीहरु आफ्नो खेलमा ध्यान देउ भनेपछि केही सहज भयो । खेलाडी लयमा फर्किएकै कारण गोल गर्न सफल भयौं ।’

जितको सम्भावना कम भएको अवस्थामा काउन्टर अट्याकको खेल खेलेको उनले सुनाए । खेलाडीले पहिलो पटक यस्तो जुत्ता लगाएका कारण पनि सुरुवाती खेलहरुमा असहज भने भएको उनले बताए । तर, मनिषले भने जुत्ताको बारेमा आफुसंग केहि कुरा नगरेको सुनाए ।

यो खेलसंगै राउन्डरोविन आधारमा खेलाइएको लिग चरण सम्पन्न भएको छ । अब सविनले फाइनलका लागि एलिमेटर राउन्ड खेल्नुपर्नेछ । एलिमेटरमा सविनले पुन: शंखमुलकै सामना गर्नुपर्नेछ । जितसंगै सविनको ९ खेलबाट १६ अंक रहँदै लिगतालिकाको चौथो स्थानमा उक्लिएको छ । सविनले ५ खेलमा जित, ३ खेलमा हार र १ खेल बराबरी खेलेको थियो ।

तालिकाको दोस्रो स्थानमा रहेको द राइजिङ क्लब धरानको भने ९ खेलबाट १९ अंक रहेको छ । राइजिङले ६ खेलमा जित, २ खेलमा हार र १ खेल बराबरी खेलको थियो । शंखमुलको भने ९ खेलबाट १९ अंक रहेको छ । शंखमुलले ५ खेलमा जित, १ खेलमा हार र ३ खेल बराबरी खेलेको थियो । उता लिगको शिर्षस्थानमा रहेको अर्को घरेलुटोली स्पोर्ट्स क्यासलको भने ९ खेलबाट २२ अंकका साथ तालिकाको शीर्षस्थानमा रहेको छ । क्यासलले ७ खेलमा जित १ खेलमा हार र १ खेल बराबरी खेलेको थियो ।

अब लिग शिर्षस्थानको टोली क्यासल र दोस्रो स्थानको टोली द राइजिङले फाइनल प्रवेशका लागि बुधबार पहिलो क्वालिफायर खेल्नेछ । तालिकाको तेस्रो स्थानमा रहेको शंखमुल र चौथो स्थानको सविनले एलिमिनेटर खेल्नेछन् । क्वालिफायरमा पराजित हुने टोलीले फाइनलमा स्थान बनाउन एलिमिनेटरको विजेतासँग विहीबार खेल्नेछ ।