विजय नेपाली, पोखरा

राष्ट्रिय ए डिभिजन फुटसल लिगको उपाधि घरेलु टोली स्पोर्ट्स क्यासलले हात पारेको छ । क्यासलले शंखमुललाई फाइनलमा ४–२ गोल अन्तरले हराउँदै उपाधि घरमै राख्न सफल भएको हो । लिग च्याम्पियन क्यासलले उपाधिसहित १० लाख रुपैयाँ हात पार्यो । उपविजेता शंखमुलले ५ लाख रुपैंया प्राप्त गर्यो ।

प्रतिस्पर्धात्मक खेलमा क्यासललाई जिताउन किशोर गुरुङ नायक बने । उनले फाइनलमा ह्याट्रिक गर्दै टोलीलाई जित दिलाए । क्यासलले खेलको सुरुवात देखि नै शंखमुललाई दबाब दियो । उपाधि दाबेदार मानिएको शंखमुलमा भने खेलाडीमा केहि थकान देखिएको थियो । खेल सुरु भएको छैठौँ मिनेटमा क्यासलका विजय गुरुङले गोल गर्दै अग्रता दिलाए । गोल खाएसंगै शंखमुल दबाबमा खेलेको थियो । तर, ११ औं मिनेटमा लक्ष्मण थापा मगरले गोल गर्दै खेल बराबरीमा ल्याए ।

त्यसपछि खेल निकै रोमाञ्चक बन्न पुग्यो । पहिलो हाफ सकिन केहि सेकेन्डको मात्रै समय रहँदा क्यासलका किशोरले गोल गर्दै अग्रता दोब्बर पारे । उनले २१ औं मिनेटमा गोल गरे । २३ औं मिनेटमा शंखमुलका मणि लामाले गोल गर्दै खेल ३–२ को स्थितिमा पुर्याएपछि खेलको रौनक झन बढ्न थालेको थियो । क्यासललाई अग्रता जोगाउँदै गोल गर्न थियो भने शंखमुललाई खेलमा फर्कन पर्ने अवस्था थियो ।

लगातार ३ खेल खेल्दै फाइनल प्रवेश गरेको शंखमुलले २४ घण्टासमेत विश्राम गर्न पाएको थिएन । क्यासलले भने विश्राम गर्ने अवसर पाएको थियो । शंखमुलका खेलाडीमा थकान बढ्दै गएपछि ३९ औं मिनेटमा किशोरले गोल गर्दै ह्याट्रिक पुरा गर्दा जित निश्चित देखियो । त्यस अघि ३–२ को स्थितिमा रहेको समयमा खेल सकिन मात्रै २ मिनेट बाँकी थियो । खेलमा फर्किन प्रयास गरेको शंखमुलले आफ्नो पुरै पोष्ट छाडेर अघि खेल्दा किशोरले फाइदा उठाउँदै गोल गरेका थिए ।

को को भए उत्कृष्ट ?

खेलको विधागत पुरस्कार तर्फ क्यासल र शंखमुलले २/२ विधामा हक जमाए । खेलको उत्कृष्ट आला शंखमुलका मणि लामा घोषित भए । यस्तै उत्कृष्ट गोलरक्षक पनि शंखमुलकै पोल्टामा पर्यो । टिम कप्तान समेत रहेका अनिष श्रेष्ठ उत्कृष्ट गोलरक्षक घोषित भए । क्यासलका प्रशिक्षक विष्णु गुरुङ उत्कृष्ट प्रशिक्षक घोषित भए । क्यासलकै सुमित उदीयमान खेलाडी घोषित भए । उत्कृष्ट फिक्सो भने फुटसल ५ धरानका विजय श्रेष्ठले हात पारे । उनीहरुसबैले समान २५ हजार रुपैँयाको साथमा ट्रफि हात पारे ।

फुटसल हुनु सकरात्मक – प्रशिक्षक प्रकाश परियार (शंखमुल)

समग्रमा फुटसल यसरी हुनुमा धेरै नै सकरात्मक पक्ष हो हामी क्लबहरुका लागि । यो सुरुवात पनि हो । यसमा कति त्रुटिहरुपनि थिए । रेफ्री, आयोजक र हामी क्लबहरुकोबाट पनि । यो सबै कुरालाई सुधार गरेर जानु नै उत्तम उपाए हो ।

विगत ८ वर्षदेखि हामी फुटसलमा लागिपरेका थियो । आजकै दिन आउँछ भनेर नै हामी लागिपरेका हौं । आगामी दिनमा अझै राम्रो बनेर आउने छौ । यो पहिलो पटकको अनुभव हो । हामीले अन्तराष्ट्रिय फुटसलको मान्यता अनुसार खेल खेल्यौं । म्याटमा खेल्दा कन्ट्रोल व्यालेन्सदेखि लिएर फिटनेसका कुराहरु पनि धेरै चाहिने अनुभव गर्यौ । हामीले खेल्दै आएको भन्दा फरक छ । नियम सबै एउटै हुनुपर्ने हो । हामीले फुटबलकै नियममा खेल्यौ तर, फुटसलको नियम भने धेरै फरक हुँदो रहेछ । हामीले पनि सिक्ने अवसर पायौं ।

वास्तविक फुटसलको परिभाषा दियो – विष्णु गुरुङ, उत्कृष्ट प्रशिक्षक – स्पोर्ट्स क्यासल

नेपालमा पहिलो पटक फुटसलको राष्ट्रिय लिग भयो । यो एकदमै अविस्मरणीय क्षण भयो । पहिलो पटक भएकाले कमी कमजोरी आफ्ना ठाउँमा छन् । तर, अहिले आउँने नयाँ युवा खेलाडीलाई भने बाटो खोलिदिएको छ । यस्को सकारात्मक पक्ष भनेको राष्ट्रिय फुटसल टिम राम्रो हुनु हो । पहिला सानो स्थानमा छनोट गरेका थियौ ।

आर्टिफिसियल ग्राउन्डमा अहिले भने हामीले रियल ग्राउन्डमा रियल रेफ्री र प्रपर वे मा खेलेका छौ त्यसैले यो निकै उत्कृष्ट रह्यो । यसमा सुधार गर्नपर्ने धेरै छन् । रेफ्री देखि लिएर खेलाडीलाई समेत बाहिर एक्सपोजर गर्नुपर्ने देखिन्छ । एन्फाले अब फुटसललाई नै भनेर पनि लाग्नु पर्ने देखिन्छ । पहिलादेखि नै फुटसल भनेर काठमाडौंमा मात्रै प्रख्यात थियो । मिनि फुटबलमा फुटसल भनेर खेलाइन्थ्यो ।

फुटसल भनेर गलत परिभाषा दिइएको थियो, अहिलेको यो रियल फुटसल हो ।अन्तराष्ट्रिय मापदण्ड अनुसारको फुटसल भनेको यो हो भनेर एन्फाले देखाएको छ । यहि कारणले वास्तविक फुटसल चिनियो ।

फुटसलमा अवसर पाए यसैमा लाग्छु – सुमित श्रेष्ठ (उदीयमान खेलाडी)

अहिले क्यासलका लागि खेलियो अब देशका लागि पनि खेल्न मन लागेको छ । यो ठुलो प्रतियोगिता खेलेको पहिलो पटक हो । हामीले पनि सक्दो रहेछौँ भन्ने अनुभव भयो । काठमाडौंमा मात्र नभएर मोफसलमा पनि राम्रो छ भन्ने देखाइयो । फुटसलमा करियर भए यतै लाग्छु ।

काठमाण्डौँ बाहिर पनि उत्कृष्ट खेलाडी छन् – अनिष श्रेष्ठ, कप्तान शंखमुल फुटसल (उत्कृष्ट गोलरक्षक)

काठमाडौं बाहिर पनि मैले धेरै स्कोप देखे । हामी बाहिर खेल्नजाँदा पनि हामीलाई धेरै पटक हराएको थियो । धेरै खेलाडीसंग चिनजान भइसकेको छ । अब राष्ट्रिय टिम छनोटमा राम्रा खेलाडी आउने आशा गरेको छु । पहिलो पटक देशभरबाट खेलाडी छनोट हुनु राम्रो हो । लिग सम्पन्न हुँदा निकै खुसी लाग्यो । हामीले उपाधि नजितेपनि फुटसल खेल आयोजना गरेकोमा एन्फा प्रति आभारि छु ।

अब फुटसलकै रेफ्री पनि हुनु आवश्यक छ – सुरज मानन्धर, रेफ्री एसेसर

हामीले नेपाली फुटसल जगतकै एक उर्जाको रुपमा विकास भएको छ । सुरुका दिनमा केहि विवाद आए । कसरी आयो भन्दा सबै खेलाडी रेफ्री फुटबल क्षेत्रबाट आएकाले समस्या आएको थियो । फुटसल र फुटबल खेल्ने तरिका फरक छ । फुटसल प्राविधिक गेम हो र फुटबल भनेको पावर गेम हो ।

सुरुका दिनहरुमा फुटबल क्षेत्रबाट आएका खेलाडीहरुले खेलेका कारण विवाद आएको हो । हामीले नियन्त्रण गर्न निकै कठिन परिस्थितिको सामना गर्न पर्यो । विवाद भएपछि हामी रेफ्रीहरु, प्रशिक्षकहरु बसेर फुटसलका नियबारे बुझायौं र मैलेपनि त्यो गरे । त्यसपछिका दिनमा राम्रो प्रदर्सन भयो । नेपाली रेफ्रीले फुटसल खेलाएको पनि यो पहिलो नै हो हामीले पहिलाका दिनमा विवाद आउँदा रेफ्रीकै गल्ति हुदाँसमेत कारवाहि गर्यौं ।

हामीले अब यो विषयमा ध्यान दिएर लाग्नु परेको छ । अहिले जति रेफ्री आए सबै फुटबलबाटै आए तर, वहाँहरुको माइन्ड मेकअप सेट गर्नलाई समस्या भयो । फुटसलका लागि अलग्गै अवसर हुनुपर्दछ । फुटसल खेलाउनुपर्ने रेफ्रीको छुट्टै समूह हुनुपर्दछ । फुटसल एसोसियसनसँग मिलेर वार्ता बसेर नै हामी जानुपर्दछ ।