लिभरपुल (एजेन्सी)– प्रिमियर लिग उपाधिको दाबेदारीलाई बलियो बनाउन लिभरपुलले पहिलो रोजाईको टोली उतार्नेछ । प्रिमियर लिगको अन्तिम दिन आइतबार दाबेदार लिभरपुलले उल्भ्सको सामना गर्नेछ । अर्को तर्फ उपाधि रक्षाको अभियानमा रहेको म्यानचेस्टर सिटीले ब्रिगटोनसँग प्रतिस्पर्धा गर्नेछ ।

प्रिमियर लिग उपाधिको छिनोफानो अन्तिम दिन हुन लागेको यो आठौं पटक हो । च्याम्पियन्स लिग फाइनल पुगेको लिभरपुलले सन् १९९० यता प्रिमियर लिग उपाधि जितेको छैन ।

यसपटकको उपाधि दौड कम रोचक छैन । सिटी लगातार १३ खेल देखि विजयी रहँदै आएको छ भने लिभरपुलको निरन्तर जितको संख्या ८ छ । जनवरी देखि दुवै टोली हारेका छैनन् । शीर्षस्थानको सिटीको ९५ र लिभरपुलको ९४ अंक छ । दुई मध्ये जुन टोली दोस्रो भएपनि अहिले सम्म उपविजेता टोलीले प्राप्त गरेको सर्वाीधक अंक हुनेछ ।

सिटीले अन्तिम खेल जित्दा उपाधि रक्षा गर्नेछ । लिभरपुलले भने आफुले जितेर मात्र पुग्ने छैन । लिभरपुलले उपाधि जित्नका लागि सिटीको नतिजाले प्रभाव पार्नेछ । लिभरपुलले सातौं स्थानको उल्भ्सको सामाना गर्दा सिटी सामू कमजोर प्रतिद्वन्द्वि ब्राइटन अंक तालिकाको १७ औं स्थानमा छ ।

लिभरपुल निकै लयमा र उच्च मनोबलका साथ उत्रने सम्भवना छ । बार्सिलोनाविरुद्ध च्याम्पियन्स लिग सेमिफाइनलको पहिलो लेग ३–० ले गुमाएको लिभरपुलले दोस्रो लेगमा ४–० को जित निकाल्दै जुन १ मा हुने फाइनलका लागि स्थान सुरक्षित गरेको थियो । लिभरपुल र टोटेनह्यामबीच जुन १ मा म्याड्रिडमा फाइनल हुनेछ ।

सिटी भने प्रिमियर लिगसहित घरेलु फुटबलमा तीन उपाधि जित्ने पहिलो इंङ्लिस टोली बन्ने दाउमा हुनेछ । पेप ग्वार्डिओलको टोलीले काराबाओ कपको फाइनलमा चेल्सीलाई पेनाल्टीमा हराइसकेको छ । त्यस्तै आउने शनिबार टोलीले वाटफोर्डसँग एफए कप फाइनल खेल्नेछ । तर, तीन उपाधि जित्ने सम्भावनालाई कायम राख्न सिटीले आजको उपाधि जित्नु पर्ने हुन्छ ।

हामीले उल्भ्सका बारेमा सोचेका छौं, सन् २०१२ मा बोरुसिया डर्टमन्डलाई उपाधि दिलाएयता खाली हात रहेका लिभरपुलका प्रशिक्षक योर्गन क्लोपले भने, हामीले शुभकामनाका थुप्रै सन्देश प्राप्त गेका छौं । हाम्रो यात्रा अविश्वसनिय रह्यो । अन्तिम दिनका लागि शुभकामना लिउ र उल्भ्ससँगको खेलका बारेमा सोचौं ।

सिटीले उपाधि जितेमा एलेक्स फर्गुसन र जोस माउरिन्होपछि लगातार दुई पटक प्रिमियर लिग उपाधि जित्ने ग्वार्डिओला तेस्रो प्रशिक्षक हुनेछन् । सपना पुरा गर्ने क्रममा छौं । तर हामी अहिले जुन अवस्थामा छौं , त्यस्तो होला भन्ने अनुमान थिएन, ग्वार्डिओलाले भने, कठिन पक्कै हुनेछ । हामी अन्तिम खेलमा केन्द्रित छौं । त्यो बाहेक हामीले अरु सोचेका छैनौं ।