चन्द्रकान्त न्यौपाने, कपिलवस्तु

कपिलवस्तुको बाणगंगा नगरपालिकामा ब्याडमिन्टन बिस्तारै लोकप्रिय बनिरहेको छ । कहि अघि सम्म ब्याडमिन्टनमा पेशाकर्मीहरुको मात्र आकर्षण थियो । अहिले भने नगरका दर्जन बढी स्थानमा ब्याडमिन्टन कोर्टहरु तयार भएका छन् । त्यसबाट पनि यहाँ ब्याडमिन्टनप्रति बढ्दै गएको लगाव बुझ्न सकिन्छ ।

नगरका ४ नम्बर, ओदारी, गजेहडा, पिपरा, राजपुर, बोडगाउँ, बनगाई, झुँगा लगायतका स्थानमा साँझ बिहान सुरक्षाकर्मी, बैङ्कर, स्वास्थ्यकर्मी, शिक्षक, पूर्व सेना, संचारकर्मी, ब्यापारी, ब्यवसायी, विद्यार्थी, युवाहरु कोर्टमा झुम्ने गरेका छन् । बनगाई, ४ नम्बर, झुँगामा रातीमा खेल्नका लागि लाइटको व्यवस्था गरिएको छ ।

कपिलवस्तुको उत्तरी क्षेत्र मुख्यतः फुटबल लोकप्रिय छ । क्रिकेट र भलिबलमा पनि युवाहरुको आकर्षण देखिन्छ । कोभिड १९ का कारण चैत ११ गतेबाट सरकारले लकडाउन गरेको थियो । जसले गर्दा समूहगत खेलहरुका लागि अभ्यास गर्न र खेल्न सम्भवन भएन । त्यसको विकल्पमा ब्याडमिन्टनमा युवाहरुको आकर्षण बढेको इलाका प्रहरी कार्यालय पिपराका इन्सपेक्टर आयुष जोशी बताउँछन् । उनी आफै पनि नियमित ब्याडमिन्टन अभ्यास गर्छन् ।

जोशीले आफू कपिलवस्तु आउँदा सुरुको अवस्था र अहिले फरक रहेको सुनाए । उनले भने ‘अहिले यहाँका युवा र पेशाकर्मीमा पनि ब्याडमिन्टन प्रतिको क्रेज देख निकै खुसी लाग्छ ।’ शारीरिक दुरी राखेर खेल्न मिल्ने भएकालेले पनि लकडाउनको समयमा ब्याडमिन्टमा धेरैको रुची बढेको जोशीको विश्वास छ ।

शौखका लागि मात्र नभइ अब विस्तारै ब्याडमिन्टनका प्रतियोगिता पनि हुन थालेका छन् । त्यसमा पनि मुख्यतः मेन्स डबल्स प्रतियोगिता बढी हुने गरेका छन् । केही अघि रोटर्याक्ट क्लव अफ कपिलवस्तु मिड टाउनले आयोजना गरेको प्रतियोगितामा २० र कपिलवस्तु जेसिजले आयोजना गरेको नगरस्तरीय ब्याडमिन्टनमा २४ जोडीको सहभागिता थियो ।

स्थानिय प्रतियोगिता बढ्दै जानु र त्यहाँ खेलाडीहरुको प्रदर्शन देखेर स्थानिय पुराना खेलाडी खडक आले दंग छन् । उनले बढी भन्दा बढी मानिसहरुले अभ्यासलाई नियमित गर्दै जाने र प्रतियोगिता आयोजना हुने हो भने राष्ट्रिय खेलाडी निस्कन सक्ने आशा राखेका छन् ।

अर्का खेलाडी झुँगाका अमर रेश्मीले पछिल्लो समयमा ब्याडमिन्टन प्रति यो क्रेज देख्दा खुसी लागेकोब बताए । उनले भने ‘ सुरु सुरुमा हामी केही साथी मात्रै खेल्थ्यौँ अहिले सबैजनाले ब्याडमिन्टन खेल्न रुची देखाउँदा उत्साहित हुन्छु । ’

स्थानिय रुपमा कोर्टहरु निर्माणको क्रम बढ्न थालेको छ । नगर भित्र पहिलोपटक ओदारीमा कभर्ड हल निर्माण गरिएको छ । त्यहाँ कभर्ड हल र अन्य स्थानमा अभ्यास गर्ने दर्जन जति टिम छन् । घरमा सामान्य रुपमा खेल्न अभ्यास गरेकाहरु पनि कोर्ट बनाउन थालेका छन् ।

नगरका विद्यालय, होटल, रिसोर्टमा ब्याडमिन्टन कोर्ट निर्माण सुरु गरिएको छ । गजेहडाको बाल माविमा २ वटा कार्ट निर्माण गरिएको छ । जहाँ बिहान साँझ ब्याडमिन्टन अभ्यास हुन थालेको छ । सानो ठाँउमा कोर्ट निर्माण गर्न सकिने र ब्याडमिन्टनले शारीरिक व्यायमका साथै मनोरञ्जन पनि भएकाले धेरैको आकर्षण बढेको खेलाडी बताउँछन् ।

खेल्नेहरुको आकषर्णसँगै खेल हेर्नेहरुको संख्या पनि पहिलाको भन्दा बढेको देखिन्छ । कोभिड १९ को कारण गरिएको लकडाउनका बीचमा २ पटकसम्म भएका नगरस्तरीय प्रतियोगिता हेर्ने दर्शकको उल्लेख साथ रहेको थियो । बाणगंगा नगरमा भएको यो ब्याडमिन्टन क्रेजले जिल्लामा उत्साह थपेको जिल्ला खेलकुद विकास समतिका पूर्व अध्यक्ष छवि रेश्मी मगर बताए ।