काठमाडौं (हाम्रो खेलकुद)– नेपाल ब्याडमिन्टन संघले आफ्ना उप महासचिव लवभक्त श्रेष्ठले बुझाएको राजीनामा स्वीकृति गरेको छ ।

१३ औं दक्षिण एसियाली खेलकुद (साग) को दौरान र ब्याडमिन्टनका अन्य प्रतियोगिता आर्थिक अनियमिततामा आफ्नो नाम मुछिएपछि श्रेष्ठले राजीनामा दिएको हुन सक्ने अनुमान गरिएको छ । यद्दपी उनले कार्यव्यस्तताको कारण देखाउँदै राजीनामा दिएका थिए ।

संघको शनिबार बसेको सचिवालय बैठकले श्रेष्ठको राजीनामा स्वीकृत गरेको अध्यक्ष रामजीबहादुर श्रेष्ठले बताएका छन् । अध्यक्ष श्रेष्ठले भने, ‘कार्यव्यस्तता र अब गृह जिल्ला मोरङमै बस्ने हुँदा समय दिन नसक्ने भन्दै उप महासचिव श्रेष्ठले बुझाएको राजीनामालाई हामीले स्वीकृत गरेका हौं ।’

साग ब्याडमिन्टनका दौरान समान खरिदमा अनियमितता भएको विषय विभिन्न सञ्चारमाध्यममार्फत सार्वजनिक भएपछि युवा तथा खेलकुद मन्त्री जगतबहादुर विश्वकर्माले शुक्रबार मन्त्रालयमा बैठक डाक्दै छानविन प्रक्रिया अघि बढाउँदै दोषीमाथि कारवाही गर्न राष्ट्रिय खेलकुद परिषद् (राखेप) का सदस्य सचिव रमेश सिलवाललाई निर्देशन दिएका थिए ।

राखेपले साग ब्याडमिन्टनको सामान खरिद र अन्य विषयमा छानविन गर्न छिट्टै समिति बनाउने तयारी भइरहेको बताइएको छ । गत वर्ष आयोजना भएको सागका लागि राखेपले सबै खेलको सामाग्री खरिद आफै गरेको थियो भने व्यवस्थापनको जिम्मेवारी सम्बन्धित संघलाई दिएको थियो ।