मस्कट (हाम्रो खेलकुद) – नेपाली क्रिकेट टोलीका कप्तान सन्दीप लामिछाने आइसिसी टि२० विश्वकप छनोट ए मा तेस्रो स्थानको लागि ओमानसँग भएको खेलमा प्लेयर अफ द म्याच चुनिएका छन् । नेपाललाई ९ विकेटको सहज जित दिलाउन सन्दीपले बलिङमा उच्च प्रदर्शन गरेका थिए ।

सन्दीपले ४ ओभरमा १३ रन खर्चेर ३ विकेट लिएपछि ओमान क्रिकेट एकेडेमी ग्राउन्ड–२ मा टस जितेर पहिला ब्याटिङ थालेको ओमानले निर्धारित २० ओभरमा ९ विकेट गुमाउँदै ८७ रन बनाएको थियो ।

सन्दीप विश्वकप छनोटमा पाँच मध्य दोस्रो खेलमा प्लेयर अफ द म्याच चुनिएका हुन् । यसअघि सन्दीप क्यानडाविरुद्ध आफ्नो टि२० आई करिअरकै पहिलो टि२० आई प्लेयर अफ द म्याच चुनिएका थिए । उक्त खेलमा क्यानडा १५ ओभरमा ८० रनमा अल आउट गर्न सन्दीपले ४ ओभरमा १२ रन खर्चेर मध्यक्रमका महत्वपूर्ण ३ विकेट लिएका थिए ।

ओमानले प्रस्तुत गरेको ८८ रनको सामान्य विजयी लक्ष्य पछ्याएको नेपालले १६.२ ओभरमा १ विकेट गुमाउँदै पूरा गर्दै तेस्रो बन्यो । नेपालको जितका ओपनर कुशल भुर्तेल ५३ बलमा ३ चौका र २ छक्कासहित ५५ रनमा अविजित रहे । विजयी चौका प्रहार गरेका आरिफ शेख २७ बलमा १ चौकासहित २१ रनमा अविजित रहे ।

नेपाल पहिलो सेमिफाइनल खेलमा युनाइटेड अरव इमिरेट्स ९(युएई) सँग ६८ रनले पराजित हुँदै आगमी अक्टोबर नोभेम्बरमा हुने टि२० विश्वकपबाट बन्चित भएको थियो । नेपाल समूह बी बाट अपराजित रहँदै सेमिफाइनल खेलेको थियो । नेपालले समूह चरणमा ओमानलाई ३९ रन, फिलिपिन्सलाई १ सय ३६ रन र क्यानडालाई ८ विकेटले हराएको थियो ।

नेपालले अव मार्च तेस्रो साता आइसिसी विश्वकप लिग २ अन्तर्गत युएईमा पपुवा न्युगिनी त्रिकोणात्मक ओडिआई सिरिज खेल्नेछ । नेपालले पपुवा न्युगिनीसँग १६ मार्चमा खेल्दै सिरिजको सुरुवात गर्नेछ ।

ओमानलाई हराउँदै नेपाल विश्वकप छनोटमा तेस्रो