काठमाडौं( हाम्रो खेलकुद) – बायाँ हाते तीव्र गतिकी बलर ईश्वरी विष्टको उत्कृष्ट बलिङको सहयोगमा सुदूरपश्चिम प्रदेशले ललितपुर मेयर वुमन्स च्याम्पियनसिप टि२० प्रतियोगितामा प्रदेश १ माथि ६ विकेटको सहज जित हात परेको छ । यो जितसँगै सुदूरपश्चिम दोस्रो स्थानमा रहँदै फाइनलमा पुग्ने सम्भावना बलियो बनाएको छ ।

५३ रनको सामान्य विजयी लक्ष्य पछ्याएको सुदूरले १० ओभरमा ४ विकेट गुमाउँदै पूरा गर्यो । उसको जितमा विन्दु रावलले २८ बलमा ४ चौकासहित २७ रन बनाइन् । रेवति धामी ४, रुवि पोद्दार २ र ऋतु कनोजिया ९ रनमा आउट भइन् । कविता कुँवर ६ र सम्झना खड्का १ रनमा अविजित रहिन् । प्रदेश १ की कप्तान रुविना क्षेत्रीले सर्वाधिक २ विकेट लिइन् ।

त्यसअघि टियु क्रिकेट मैदानमा टस जितेर पहिला ब्याटिङ थालेको प्रदेश-१ ले १८.४ ओभरमा ५२ रनमा अल आउट भयो । प्रदेश १ की सङ्गिता राइले २९ बलमा सर्वाधिक १२ रन बनाइन् । सबनम राईले १८ बलमा १० रन बनाइन् । कप्तान रुविना क्षेत्री बेलबासे ८, काजल श्रेष्ठ ७, अप्सरी बेगम २ रनमा आउट भइन् । राष्ट्रिय महिला टोलीका पाँच खेलाडी सम्मिलित प्रदेश १ ईश्वरीको उत्कृष्ट बलिङको सहयोगमा ५२ रनमै अल आउट भएको थियो ।

ईश्वरीले रुविना, निग्मा तामाङ र लखिता राजवंशीलाई बोल्ड आउट गरेकी थिइन् । काजल श्रेष्ठलाई सम्झना खड्बाट क्याच गराइन् । शीर्ष पाँच मध्य चार विकेट लिएपछि प्रदेश १ सस्तैमा समेटिएको थियो । ईश्वरीले ४ ओभरमा १ मेडनसहित १० रन खर्चेर ४ विकेट लिइन् । कविजा जोशी र सम्झना खड्काले २–२ विकेट लिइन् । कविता कुँवर र ऋतु कनोजियाले १–१ विकेट लिए ।

सुदूरले शनिबार लुम्बिनी प्रदेशलाई हराए फाइनलमा स्थान बनाउने छ । सुदूरले पहिलो खेलमा ललितपुर मेयर्स-११ लाई ५८ रनले पराजित गर्दा एपिएफसँग ६ विकेटले हारेको थियो । एपिएफ ३ खेलमा ६ अंकका साथ एक खेल अगावै फाइनलमा पुगि सकेको छ ।