काठमाडौं (हाम्रो खेलकुद) – नेपाली क्रिकेट टोलीका युवा लेगस्पिनर सन्दीप लामिछानेले पपुवा न्युगिनी (पिएनजी) विरुद्ध लगातार प्लेयर अफ द म्याच बनेका छन् । पिएनजीविरुद्ध ऐतिहासिक डे नाइट (दिउँसो र रात) को खेलमा नेपाललाई १ सय ५१ रनको कीर्तिमानी जित दिलाउन सन्दीपले एक्लै ६ विकेट लिँदै विश्व कीर्तिमान बनाएका थिए ।

सन्दीपकै घातक बलिङमा जितको लागि २ सय ३४ रनको विजयी लक्ष्य पछ्याएको पिएनजी १९.१ ओभरमा ८२ रनमा अल आउट भयो । नेपालले पिएनजीलाई १ सय ५१ रनको फराकिलो अन्तरले पराजित गर्दै कीर्तिमान कायम गरेको छ । जुन ओडिआईमा नेपालको सर्वाधिक ठूलो जित हो । यसअघि ओडिआईमा नेपालको ठूलो जित सन् २०१९ मा युएईविरुद्ध १ सय ४५ रनको अन्तर थियो ।

नेपाललाई कीर्तिमानी जित दिलाउन शुक्रबार सन्दीपले ५.१ ओभरमा ११ रन खर्चेर ६ विकेट लिँदै आफ्नो करिअरकै उत्कृष्ट प्रदर्शन गरे । सन्दीपनै खेलको प्लेयर अफ द म्याच बने । यसअघि पिएनजीविरुद्ध पहिलो खेलमा पनि सन्दीप प्लेयर अफ द म्याच बनेका थिए । पहिलो खेलमा नेपालले दुई विकेटको संघर्षपूर्ण जित हात पार्दा सन्दीपले १० ओभरमा ३५ रन खर्चेर ४ विकेट लिएका थिए ।

नेपाललाई सिरिज २-० ले जिताउन नायक बनेका सन्दीप लगातार प्लेयर अफ द म्याच बनेका हुन् । सन्दीप ओडिआईमा लगातार तेस्रो पटक प्लेयर अफ द म्याच चुनिएका छन् । गत वर्ष अमोरिकालाई ३५ रनमा अल आउट गर्न सन्दीपले ६ विकेट लिँदै प्लेयर अफ द म्याच चुनिएका थिए ।

सन्दीपले सर्वोत्कृयट प्रदर्शन गर्दा ब्याटिङमा ८६ रनको महत्वपूर्ण इनिङ खेलेका युवा ब्याट्सम्यान ओझेलमा परेका हुन् । सन्दीपले ओडिआईमा लगातार तीन इनिङमा चार वा सोभन्दा बढी विकेट लिने विश्व कीर्तिमान बराबरी गरेका हुन् । ओडिआईमा लगातार चारभन्दा विकेट लिने कीर्तिमान लगातार तीन इनिङ छ ।

सन्दीप नेपालबाट ओडिआईमा दुई पटक पाँचमाथि विकेट लिने पहिलो बलर बनेका छन् । सोमपाल कामी नेपालबाट ओडिआईमा ५ विकेट लिने पहिलो खेलाडी हुन् । नेपालबाट ओडिआईमा एकै खेलमा पाँच विकेट लिने सोमपाल र सन्दीप मात्रै हुन् । नेपालले हालसम्म १२ ओडिआई खेल खेलेको छ । जसमा ७ खेलमा जित र ५ खेलमा हार छ । सन्दीप सर्वाधिक धेरै तीन पटक प्लेयर अफ द म्याच चुनिएका छन् । सोमपाल कामी दुई, पारस खड्का र करण केसी एक एक पटक प्लेयर अफ द म्याच चुनिएका छन् ।

अल अमरेत क्रिकेट मैदानमा टस जितेर पहिला ब्याटिङ रोजेको नेपाल ४९.३ ओभरमा २ सय ३३ रनमा अल आउट भएको थियो । नेपालका लागि रोहित कुमार पौडेलले १ सय २३ बलमा २ चौका र ३ छक्का सहित सर्वाधिक ८६ रनको इनिङ खेलेका थिए । कप्तान ज्ञानेन्द्र मल्ल ४५ र करण केसीले ४२ रनको योगदान दिएका थिए ।

आइसिसी विश्वकप लिग–२ अन्तर्गत ओमान र अमेरिकासँग त्रिकोणात्मक ओडिआई सिरिजको तयारीको लागि नेपालले पपुवा न्युगिनीसँग दुई खेल खेलेको हो । पहिलो खेलमा पपुवा न्युगिनीलाई नेपालले २ विकेटले पराजित गरेको थियो । पिएनजीसँग दुई खेलसँगै नेपालको तयारी पूरा भएको छ । नेपालले पहिलो खेल भदौ २८ मा अमेरिकासँग खेल्ने छ । दोस्रो खेल भदौ २९ मा ओमानसँग खेल्ने छ । असोजमा १ मा अमेरिका र असोज ३ मा ओमानसँग खेल्ने कार्यक्रम छ ।

यो पनि पढ्नुहोस् :

सन्दीपको विश्व कीर्तिमान

सन्दीपको ६ विकेटसँगै नेपालको कीर्तिमानी जित