काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिज अन्तर्गत तेस्रो खेलमा आज अमेरिकासँग खेल्दैछ । खेल नेपाली समय अनुसार दिउँसो ४ः १५ पछि ओमानको अल अमरेत क्रिकेट मैदान मस्कटमा सुरु हुनेछ ।

नेपालले पहिलो खेलमा अमेरिकालाई ५ विकेटले पराजित गरेको थियो । ओमानसँग नेपाल ५ विकेटले पराजित हुन पुगेको थियो । ओमानले अमेरिकालाई बिहीबार राती ४ विकेटले हराएको थियो । अमेरिकाले नेपालसँगको खेलको तुलनामा बलिङमा धेरै सुधार गरेको थियो । अमेरिकाले प्रस्तुत गरेको १ सय ७९ रनको विजयी लक्ष्य ओमानले ४९.४ ओभरमा ६ विकेट गुमाउँदै पूरा गरेको थियो ।

ओमानसँग नेपालको बलिङ सम्झन लायक थिएन । पहिलो १० ओभरमै १ सय ८ रन खर्चेको थियो । ओमानसँग खेलमा नेपालले कमजोर प्रदर्शन गरेको हुँदा टोलीमा परिवर्तनको सम्भावना बढी छ । नेपालले आज टोलीमा दुई परिवर्तन गर्ने सम्भावना देखिन्छ । युवा अलराउन्डर कुशल मल्लको स्थानमा अनुभवी ब्याट्सम्यान शरद भेषावकरलाई मौका दिनसक्छ । कुशलले मौका पाएका चार खेलमा खराब प्रदर्शन गरेका छन् । कुशल सुरुवाती तीन खेलमा एक एक र ओमानविरुद्ध ४ रनमा आउट भएका थिए । त्यसैले उनलाई विश्राम दिने सम्भावना बढीछ । मध्यक्रम ब्याटिङ केहि कमजोर हुँदा अनुभवी ब्याट्सम्यान शरदलाई मौका दिने सम्भावना बढी रहन्छ ।

मध्य गतिका बलर विक्रम सोबलाई पनि बेन्चमा राख्ने सम्भावना छ । ओमानसँग नेपालका तीनै मध्यगतिका बलरले खराब प्रदर्शन गरेका थिए । तीन बलरले सुरुवाती १० ओभरमा १ सय ८ रन खर्चेका थिए । सोमपाल कामी, करण केसी र विक्रम सोब तीनैको प्रदर्शन खराब थियो । सोमपाल र करण ब्याटिङ राम्रो गर्ने गर्दछन् । अर्कोतर्फ यी दुई खेलाडी पहिलो रोजाईका बलर हुन् । त्यसैले विक्रमलाई बेन्चमा राख्दै युवा तीव्र गतिका गुलशन झालाई डेब्यू दिनसक्छ । विक्रमले ओमानसँग खेलमा २.१ ओभरमा २९ रन खर्चेका थिए । गुलशन तीव्र गतिसँगै बाउन्सरका लागि सिपालु छन् । नयाँ बलले उनले राम्रो प्रदर्शन गर्ने गर्दछन् ।

नेपालको ओपनिङ आसिफ शेख र कुशल भुर्तेलले नै गर्नेछन् । अमेरिकासँग आसिफ र कुशलले ६६ रनको कीर्तिमानी साझेदाी गरेका थिए । कुशलले नेपाललाई जित दिलाउन ८४ रनको महत्वपूर्ण यागदान दिएका थिए । आसिफ राम्रो सुरुवात दिनेक्रममा २३ रन बनाउँदै आउट भएका थिए । ओमानविरुद्ध आसिफले सर्वाधिक ९० रनको योगदान दिएका थिए । आसिफ र कुशलको प्रदर्शनले टोलीको नतिजामा धेरै प्रभाव पार्नसक्छ । यी दुबै ओपनर शतक नजिक पुगेर असफल भएका छन् । आजको खेलमा दुबै खेलाडी उक्त गल्ती सुधार गर्दै शतक बनाउन चाहन्छन् ।

कप्तान ज्ञानेन्द्र मल्ल तेस्रो नम्बरमा खेल्ने छन् । ज्ञानेन्द्रले सुरुवात राम्रो गरेपनि ठूलो इनिङमा बदल्न सकि रहेका छैनन् । ओमानसँग खेलमा पनि २१ रन बनाउँदै आउट भएका थिए । ज्ञानेन्द्र टोलीका प्रमुख ब्याट्सम्यान र कप्तान हुँदा उनको प्रदर्शनले अन्य खेलाडी र विपक्षी टोलीको मनोबलमा समेत प्रभाव पार्ने गर्दछ । ओमान भ्रमणमा सानदार प्रदर्शन गरि रहेका रोहित चौथो नम्बरमा खेल्ने छन् । चौथो नम्बरमा रोहितले पिएनजीविरुद्ध ८६ र अमेरिकाविरुद्ध ६२ रन बनाउदै नेपाललाई सानदार जित दिलाएका थिए । ओमानविरुद्ध २० रनमा आउट भएका थिए । युवा ब्याट्सम्यान रोहितबाट नेपालले ठूलो आशा राखेको छ । पाँचौ नम्बरमा शरद खेल्ने सम्भावना छ ।

तल्लोक्रममा करण केसी र सोमपाल कामी हुने छन् । करण ठूला सर्टका लागि चर्चित नेपाली अलराउन्डर हुन् । यी दुईबाट नेपालले उत्कृष्ट अन्त्य चाहन्छ । पिएनजीसँगको पहिलो खेलपछि सोमपालबाट अपेक्षा अनुसार प्रदर्शन हुन सकेको छैन । तुलनात्मक रुपमा करण र सोमपालको बलिङ पनि कमजोर छ । बलिङमा करण र सोमपालले सुधारिएको प्रदर्शन गर्न निकै आवश्यक छ । सोमपालले पहिलो खेलमा ४ ओभरमा ३८ रन खर्चेका थिए । जसमा एकै ओभरमा ३० रन सामेल थियो । करणले ५ ओभरमा ५२ रन खर्चेर २ विकेट लिएका थिए । विक्रमको स्थानमा गुलशनको सम्भावना छ ।

स्पिनर सन्दीप लामिछानेको प्रदर्शन निकै महत्वपूर्ण हुने छ । ओमानसँगको खेलमा उनी पेटको दुखाईको कारण बलिङ गरेका थिएनन् । सन्दीप अभ्यासमा फर्कि सकेका छन् । सुशान भारीले सन्दीपलाई राम्रो साथ दिन आवश्यक देखिन्छ । सन्दीप नेपालका मुख्य हतियार हुन् । अमेरिकाले सबैभन्दा बढी तयारी पनि सन्दीपविरुद्धनै गर्ने देखिन्छ । त्यसैले अन्य बलर पनि त्यतिनै चनाखो हुनुपर्ने हुन्छ । नेपाल र अमेरिकाबीच कडा प्रतिस्पर्धा हुने आशा राखिएको छ ।

नेपालको प्लेइङ-११ : ज्ञानेन्द्र मल्ल (कप्तान), कुशल भुर्तेल, आसिफ शेख, रोहित कुमार पौडेल, शरद भेषावकर, सोमपाल कामी, विनोद भण्डारी (विकेटकिपर) करण केसी, गुलशन झा, सन्दीप लामिछाने र सुशान भारी ।

यो पनि : नेपालले सुधार गनुपर्ने पाँच कमजोरी

अमेरिकामाथि लगातार चौथो जित निकाल्ने नेपालको लक्ष्य