एजेन्सी – पाकिस्तान क्रिकेट टोलीका कप्तान बाबर आजमले भारतीय कप्तान विराट कोहलीको कीर्तिमान तोडेका छन् । आइसिसी टि२० विश्वकप २०२१ अन्तर्गत सुपर १२ को खेलमा अफगानिस्तानविरुद्ध अर्धशतक पूरा गर्दै बाबरले कप्तानको रुपमा सर्वाधिक छिटो १ हजार रन बनाउने कोहलीको कीर्तिमान तोडेका हुन् ।

बाबरले टि२० आईमा २६ इनिङमा कप्तानको रुपमा सर्वाधिक छिटो १ हजार पूरा गरेका हुन् । यस कीर्तिमान बाबर अघि विराट कोहलीको नाममा थियो । कोहलीले ३० इनिङमा कप्तानको रुपमा १ हजार रन पूरा गरेका थिए । दक्षिण अफ्रिका पूर्व कप्तान फाफ डु प्लेसिसले ३१, आरोन फिन्च ३२ र केन विलियम्सनले ३६ इनिङमा कप्तानको रुपमा १ हजार रन पूरा गरेका थिए ।

खेलाडीको रुपमा भने बाबरले ६४ टि२० आई खेलमा १ शतक र २२ अर्धशतक सहित कुल २ हजार ३ सय ३२ रन बनाएका छन् । विराटले खेलाडीको रुपमा ९१ खेलमा २९ अर्धशतक सहित कुल ३ हजार २ सय १६ रन जोडेका छन् । पाकिस्तानले अफगानिस्तानलाई ५ विकेटले हराउँदा बाबरले ४७ बलमा ४ चौका सहित ५१ रनको इनिङ खेलेका थिए ।

जितको लागि १ सय ४८ रनको विजयी लक्ष्य पछ्याएको पाकिस्तानले १९ ओभरमा ५ विकेटको क्षतिमा पूरा गरेको थियो । आसिफ अली ७ बलमा ४ छक्का सहित २५ रनमा अविजित रहे । जितको लागि अन्तिम १२ बलमा २४ रन चाहिँएको अवस्थामा आसिफ अलीले १९ औं ओभरमा तीव्र गतिका बलर करिम जन्नतलाई चार छक्का प्रहार गर्दै जित पक्का गराएका थिए ।

पाकिस्तान टि२० विश्वकपको सुपर १२ को समूह २ मा छ । ३ खेलमा ३ मानै जितका साथ ६ अंक जोड्दै शीर्षस्थानमा रहेको पाकिस्तानको सेमिफाइनल औपचारिकता मात्र बाँकी छ । पाकिस्तानले अव मंगलबार नामिबिया र आइतबार स्कटल्यान्डसँग खेल्न बाँकी छ । आफ्नो समूहमा रहेका प्रमुख तीन टोलीलाई पाखा लगाउँदै सेमिफाइनल यात्रा निश्चित जस्तै बनाएको छ । पाकिस्तानले पहिलो खेलमा भारतलाई १० विकेट र दोस्रो खेलमा न्युजिल्यान्डलाई ५ विकेटले हराएको थियो ।

यो पनि पढ्नुहोस्ः नेपालमा चल्न नसकेका पाकिस्तानका फिनिसर आसिफ

विराट उत्कृष्ट कि बाबर ?