सुबास हुमागाईं, काठमाडौं

समूह चरणका सुरुवाती दुई खेलमा सहज जित आत्मसात गरेपनि भारतको प्रदर्शन विगतको जस्तो थिएन । प्रशिक्षक सुरेन क्षेत्रीले भारतले जितको नतिजा निकालेको कारण चिन्ता लिनुपर्ने अवस्था नरहेको बताएका थिए । समूह चरणको अन्तिम खेलमा बंगलादेशले भारतविरुद्ध एकपक्षीय प्रदर्शन गर्दै इतिहासकै पहिलो हार चखायो, तर पनि प्रशिक्षक क्षेत्री टोलीको प्रदर्शनलाई लिएर खास चिन्तित छैनन् ।

बंगलादेशविरुद्ध ३-० को फराकिलो हार बेहोर्दा भारतको आक्रमण शून्यजस्तै थियो । काउन्टर अट्याकमा पाएका केही अवसर बाहेक भारतले खासै डरलाग्दो अवसर नै सिर्जना गर्न सकेको थिएन । त्यसअघिका खेलमा भने भारतको मिडफिल्डले खेल जिताएको थियो । आक्रमणमा भारत यसपटक निकै फितलो देखिएको छ ।

प्रशिक्षक क्षेत्रीले सबै खेलमा आफ्नो सुरुवाती ११ परिवर्तन गरेका छन् । भारतले जितेका दुवै खेलमा बेन्चबाट मैदान प्रवेश गर्दै गोल गरेकी फरवार्ड सौम्या गुगुलोथले कुनै खेल सुरुवात गर्न पाएकी छैनन् । बंगलादेशविरुद्ध पनि उनी ५६ औं मिनेटमा मात्र मैदान प्रवेश गरेकी थिइन् । उनले केही अवसर पनि सिर्जना गरिन् । नेपालविरुद्ध उनले सुरुवात गर्ने सम्भावना छ ।

भारतले यस प्रतियोगितामा ४-३-३ को रणनीति अबलम्बन गर्दै आएको छ । आक्रमणमा रहेका तीन खेलाडी भने एक आपसमा पोजिसन परिवर्तन गरेर खेल्ने क्षमता राख्छन् । तर दाङमेइ ग्रेसबाहेक रेनु रानी र सन्ध्या रंगनाथनको प्रदर्शन अपेक्षित रहन सकेको छैन । भारतको कमजोर आक्रमणलाई मिडफिल्डको उत्कृष्ट प्रदर्शनले छायाँमा पारेको छ । बंगलादेशविरुद्ध त्यही मिडफिल्ड नचल्दा भारत दबाबमा पर्यो ।

बंगलादेशले ३ खेलाडी सम्मिलित मिडफिल्डको सहयोगमा भारतीय मिडफिल्डलाई चुप राख्यो । मारिया मान्दालाई रक्षात्मक मिडफिल्डमा खेलाएको बंगलादेशले मोनिका चक्मा र सन्जिदा अख्तरलाई पनि रक्षात्मक भूमिकामा राम्रो प्रयोग गर्यो । आक्रमणमा विंगरको भूमिकामा देखिने मोनिका र सन्जिदाले बल भारतसँग हुँदा मारियाको दायाँ र बायाँ भागमा रहेर भारतीय मिडफिल्डलाई जम्न दिएनन् । पूरा ९० मिनेट नै लगातार बलमा डटेका यी तीन खेलाडीको मिहिनेतलाई कप्तान सविना खातुनले आक्रमणमा लगातार अवसर सिर्जना गरेर सहयोग गरिन् ।

भारतका लागि सुरुवाती दुई खेलमा जमेको मिडफिल्ड भने बंगलादेशविरुद्ध चल्न सकेन । अन्जु तामाङ, रतनबाला देवी र प्रियंका देवी नाओरम रंगशालाको मिडफिल्डमा हराएको देखिन्थे । बंगलादेशको तीव्र गतिमा दबाब राख्ने रणनीतिविरुद्ध उनीहरु टिक्न सकेनन् । रतनबाला दोस्रो हाफको सुरुवातमै परिवर्तन भइन् भने अन्जुले विगतका खेलझैं आक्रमणमा मिल्ने अवसर नै पाइनन् । बंगलादेशी प्रशिक्षक गोलाम रोब्बानी छोटोनको मिडफिल्ड कब्जा गर्ने रणनीति सफल भयो ।

नेपालले यदि सेमिफाइनलमा नतिजा आफ्नो पक्षमा पार्ने हो भने भारतीय मिडफिल्डलाई रोक्नुपर्ने हुन्छ । तर हालसम्मको खेल हेर्दा नेपाली टोली भारतविरुद्ध मिडफिल्डमा तुलनात्मक रुपमा निकै कमजोर देखिन्छ । नेपालले जारी प्रतियोगितामा ४-४-२ को रणनीतिमा खेल्दा दीपा शाही र सरु लिम्बुलाई खेलाएको छ । दुवै आफ्नो करिअरमा आक्रामक मिडफिल्डरको भूमिकामा खेल्दै आएकोमा यसपटक सेन्टर मिडफिल्डको भूमिकामा छन् । सुरुवाती दुवै खेलमा निकै कम दबाब खेप्नुपरेको यो मिडफिल्डलाई भारतको तीन मिडफिल्ड खेलाडी रोक्न हम्मे-हम्मे पर्ने देखिन्छ ।

यसैपनि रक्षात्मक रुपमा कमजोर सेन्टर मिडफिल्डमा नेपालका विंगर अनिता बस्नेत र अनिता केसीले खास सहयोग गर्ने देखिन्न । पछिल्ला खेलमा अधिकांश समय आक्रमणमै बिताएका यी दुई आफ्नो आक्रामक खेलका लागि परिचित छन् । रक्षात्मक रुपमा केही सहयोग पुर्याउन सक्ने विमला चौधरी आजको खेलमा विकल्प हुन सक्छिन् । सेन्टर मिडफिल्डमा इन्दिरा राई र दीपा राई पनि रक्षात्मक रणनीतिका लागि प्रयोग हुने सम्भावना छ ।

नेपालले पुरानै सुरुवाती ११ लाई निरन्तरता दिँदा ‘हाई रिस्क हाई गेन’ अर्थात् ‘धेरै जोखिम या त धेरै सफलता’ को पथ पनि लिन सक्छ । सेन्टर मिडफिल्डमा आक्रामक खेलाडी राख्दा विपक्षी डिफेन्सलाई दबाब दिन सकिन्छ । तर त्यसका लागि आक्रमणमा खेल्ने खेलाडीले पाएको अवसर चुकाउनु हुँदैन । सँगसँगै सेन्टर मिडफिल्डका खेलाडी रक्षात्मक जिम्मेवारीका लागि पनि चलायमान रहनुपर्छ ।

भारतले सेन्टर डिफेन्समा कप्तान आशालता देवी र मनिषा पन्नालाई प्रयोग गरेको छ । राइट ब्याकमा भने भारतले सबै खेलमा खेलाडी परिवर्तन गरेको छ । डालिमा छिब्बर उपलब्ध नरहेपछि कमजोर भएको उक्त पोजिसनमा मिचेल कास्टान्हा, जुली किशन र ऋतु रानीलाई प्रयोग गरिएको छ । लेफ्ट ब्याकमा भने रन्जना चानु नै निरन्तर रहनेछिन् ।

यता नेपालले डिफेन्समा कुनै परिवर्तन गर्ने देखिन्न । हिरा भुजेल र अमृता जैशी लेफ्ट र राइट ब्याकमा रहँदा पुनम जर्घा मगर र गीता राना नै सेन्टर डिफेन्समा रहनेछन् । कप्तान एन्जिला तुम्बापो सुब्बालाई अन्जना रानामगरले गोलरक्षक पोजिसनमा प्रतिस्पर्धा दिएपनि प्रशिक्षक थापाले पुन: एकपटक एन्जिलामाथि विश्वास राखेका छन् । महत्त्वपूर्ण खेलमा एन्जिलाको प्रदर्शन पछिल्लो समय सम्झनलायक रहेका छैनन् । विराटनगरको साफ फाइनल, १३ औं सागको फाइनल खेल र फिलिपिन्सविरुद्ध एसियन कप छनोटको खेल लगायतमा उनको प्रदर्शन कमजोर रहेको थियो । उनलाई पनि आज भारतविरुद्ध बलियो प्रदर्शनको खाँचो छ ।

नेपालले आक्रमणमा सावित्रा भण्डारीको फिटनेस अवस्था हेरेर निर्णय गर्नेछ । अमिशा कार्कीले आक्रमणमा स्थान बनाउने पक्का छ । सावित्राले सुरुवात गर्न नसके रेखा पौडेल र रश्मीकुमारी घिसिङमध्य एकजना खेल्नेछन् । युवा र अनुभवी खेलाडीको सम्मिश्रणमा बलियो देखिएको नेपाली टोली कागजमा खेलाडी स्तर हेर्दा केही कमजोर पक्कै छ । तर घरेलु मैदान र समर्थकमाझ नेपाली टोली बलियो हुनेछ । बंगलादेशविरुद्ध हारले पिडामा रहेको भारतमाथि थप समस्या दिने नेपाली टोलीको प्रयास रहनेछ ।

यो पनि :

भारतविरुद्ध खेलअघि यस्तो छ सावित्राको अवस्था

नेपाललाई भारतविरुद्ध इतिहास रच्ने अवसर