एजेन्सी – प्रिमियर लिग क्लब म्यानचेस्टर सिटी एफए कपको क्वाटरफाइनलमा प्रवेश गरेको छ । प्रि–क्वारटफाइनलमा च्याम्पियनसिप क्लब ब्रिस्टल सिटीलाई ३–० ले पराजित गर्दै सिटीले अन्तिम आठमा स्थान पक्का गरेको हो ।

सिटीको जितमा फिल फोडेनले दुई तथा केभिन डि ब्रुएनाले एक गोल थपे । एस्टन गेट ब्रिस्टलमा मंगलबार राति भएको एकपक्षीय खेलमा सिटीले खेलको सुरुवातदेखि नै घरेलु टोलीमाथि दवाव बढाउँदा सातौं मिनेटमा नै अग्रता लिन सफल भएको थियो । फिल फोडेनले रियाद महारेजको पासमा गोल गोल गर्दै सिटीलाई १–० को अग्रता दिलाए ।

दोस्रो गोलको लागि भने सिटीले दोस्रो हाफको मध्य समय नै कुर्नुपरेको थियो । ७४औं मिनेटमा फोडेनले जुलियन अल्भारेजको पासमा व्यक्तिगत र टोलीका लागि दोस्रो गोल गर्दै सिटीको अग्रता दोब्बर पारे ।

त्यसपछि ८१औं मिनेटमा केभिन डि ब्रुएनाले गोल गर्दै सिटीलाई ३–० को सहज जित दिलाए । ब्रुएनाले ज्याक ग्रेलिसको पासमा गोल गर्न सफल भएका थिए ।

यस्तै ब्राइटन, ब्ल्याकबर्न र फुलहमले पनि क्वाटरफाइनलमा स्थान सुरक्षित गरेका छन् । ब्राइटनले स्टोक सिटीलाई १–०, ब्ल्याकबर्नले लेस्टर सिटीलाई २–१ ले तथा फुलहमले लिड्सलाई २–० ले पराजित गर्दै अन्तिम आठमा स्थान तय गरेको हो ।

अब प्रि–क्वाटरफाइनलमा साउथह्याम्टन र ग्रिम्सवी, बर्नले र फ्लेटवुड, म्यानचेस्टर युनाइटेड र वेस्ट ह्याम युनाइटेड तथा सेफिल्ड युनाइटेड र टोटेनहम हटस्परबीच खेल हुन बाँकी छ ।