विजय नेपाली, पोखरा

पोखरामा राष्ट्रिय ए डिभिजन लिग फुटसल प्रतियोगिता चलिरहेको छ । प्रतियोगिताको लिग चरण सकिँदा घरेलु टोली स्पोर्ट्स क्यासल ९ खेलमा ७ जित, १ बराबरी र १ हारसहित २२ अंक जोड्दै शीर्षस्थानमा रहयो ।

प्रतियोगितामा उपाधिको बलियो दावेदार रहेको क्यासलमा ८ नम्बरको जर्सी लगाएर खेल्ने गर्छन् सुमित श्रेष्ठ । उनको पोजिसन आला हो । सानो कदको भएको तर, बल उत्कृष्ट ढंगले काट्ने र बायाँ खुट्टा चलाउने भएकाले पोखरामा उनी मेस्सी नामले चर्चित छन् । पोखराका मेस्सी अर्जेन्टिनी मेस्सी जस्तै होचा नै छन् । होचामात्र होइनन् उनको खेल कौशल पनि मेस्सीसँग दाज्ने गरिन्छ ।

क्यासलको खेल हुदाँ फुटसल कोर्टमा पनि दर्शकहरुबाट उनलाईसमेत उत्तिकै समर्थन मिल्छ । त्यहि समर्थनबाट गञ्जिन्छ ‘मेस्सी..मेस्सी…. मेस्सी’ उनी ए डिभिजन लिग फुटसलका मेस्सीको नामले परिचित हुन थालेका छन् । उनले ६ खेलमा गोल गरेका छन् । उनको गोलसंख्या १० पुगेको छ । यद्यपी हालसम्मकै उच्च गोलकर्ता भने सविन मेमोरियलका अभिनाष तामाङ रहेका छन् । उनको १० गोल रहेको छ । सुमित श्रेष्ठले पनि उनलाई पछ्याइरहेका छन् ।

गत सोमबार स्काइ गोल्स विरुद्धको खेलमा समेत सुमितले नै अग्रता दिलाएका थिए । उनले खेलको ११ औं मिनेटमा गोल गर्दै सुरुवाती अग्रता दिलाए । उनले खेलको ३६ औं मिनेटमा व्यक्तिगत दोस्रो गोल गरे । उनले हरेक खेलमा असिस्ट समेत गरेका छन् । अधिकांश गोल उनकै पासमा भएका छन् ।

सुमितले ढुकु फुटसल हव विरुद्धको खेलमा निकै उत्कृष्ट प्रदर्शन गरेका थिए । ३–० ले पछि परेको स्थितिमा सुमितको विर्सनलायक प्रदर्सन थियो । उक्त खेलमा क्यासलले दोस्रो हाफमा ५ गोल गर्न सफल भएको थियो । सुमितले १ गोल गरेका थिए । तर, ४ गोल उनकै पासमा भएको थियो ।

सानै उमेर देखि फुटबलमा रुचिभएका सुमित आफ्ना साथिहरुमा अब्बल मध्येकै एक हुन् । यद्यपी उनका साथि रन्दिप पौडेल भने एन्फाका विभिन्न उमेर समूहबाट खेलिसकेका छन् । बारम्बार राष्ट्रिय टिमको छनोटमा परिरहेका छन् । यता सुमित भने स्थानीय खेलमा चर्चा कमाउँदै अहिले फुटसल लिगमा उत्कृष्ट मध्येकै एक खेलाडी कहलिएका छन् । तर, फुटसलको राष्ट्रिय टिममा भने पर्छन या पर्दैनन् त्यो हेर्न बाँकी छ ।

दर्शकले मेस्सी भन्दा जोश आउँछ – सुमित

दर्शकले आफूलाई मेस्सी भनेर हौसला दिदाँ जोश बढेर आउने गरेको सुमित बताउँछन् । पोखराको पृथ्वीनारायण क्याम्पसमा पूर्व राष्ट्रिय खेलाडी तथा स्पोट्र्स क्यासल संचालक समेत रहेका इश्वर गुरुङ (चन्द्र) ले नै उनलाई फुटसलमा ल्याएको उनी बताउँछन् ।

‘मलाइ फुटबल सिकाएर यहाँसम्म ल्याउने व्यक्ति चन्द्र दाई हुनुहुन्छ । वहाँले नै मलाई यहाँसम्म ल्याउनुभएको हो ’ उनले भने,‘ म सानो भएको भएरनै मलाई सबैले मेस्सी भनेर बोलाएको जस्तो लाग्छ । ठुला ठुला दाईहरुसंग खेल्दा मलाई त्यही नामले (मेस्सी) भनेर बोलाउनुहुन्थ्यो । अहिले दर्शकले पनि खेल्दा मेस्सी भनेर बोलाउँदा छुट्टै जोश र शक्ति मिल्छ । पहिला त टोलमा मात्रै मेस्सी भनेर बोलाउथे साथिहरुले तर, अहिले त सबैले चिन्न थाले नाम नै मेस्सी भयो ।’

आज गर्व गर्छु आर्फलाई – गुरुङ

इश्वर गुरुङ तिनै व्यक्ति हुन् जस्ले सुमितलाई फुटबलको तालमा पौडि खेल्न सिकाए । सानै देखि सुमित सहित अन्य ३–४ जना बालकलाई सहयोग गर्दै फुटबल सिकाए । इश्वरलाई साथ दियो बगर भाइ खलकले । इश्वर फुटसल लिगमा सुमितको खेल देखेर गर्व महसुस गरेको बताउँछन् । ए डिभिजन लिगमा खेल कौशल देखाउँदा इश्वरको मन पनि फुरुङ्ग भएको देखिन्छ । स्पोट्र्स क्यासल संचालक इश्वरले सुमितलाई मात्रै होइन उनका साथिहरुलाई पनि फुटबलमा चाहिने बुट देखी जर्सीसम्म सहयोग गर्दै आइरहेका छन् ।

‘सुमित साच्चिकै अब्बल छन् । उनी होचा भएपनि खेल कौशल अग्लो छ । अहिले उसको खेल देखेर गर्व लाग्छ । झन दर्शकले मेस्सी भनेर बोलाउँदा म आफू सफल भएको महसुस गरिरहेको हुन्छु । मेस्सीमात्र होइन् म पनि रमाउँछु मेस्सीको नाम सुन्दा’ उनले भने,‘सुरुमा विरामी हुदाँ समेत टिमका लागि खेल्ने व्यक्ति मेस्सी हो । अब राष्ट्रिय टिमबाट खेलेको हेर्न चाहन्छु । मेरो लागि त्यो भन्दा ठुलो केहि हुने छैन । मेस्सीलाई चाडै नै ए डिभिजन क्लबमा हामी देख्न पाउने छौ ।’

उ माथिल्लो स्तरमा खेल्न सक्ने खेलाडी नै हो – प्रशिक्षक विष्णु गुरुङ

‘सुमित युवा खेलाडी हुन् । पोखरामा सबैले चिनेकै खेलाडी हो । जहाँसम्म लाग्छ उसलाई राम्रो तालिम मिल्यो भने पक्कै राष्ट्रिय टिममा पर्न सक्छन् । मैले देखे अनुसार उ माथिल्लो स्तरमा मज्जाले खेल्न सक्छ । उसको खेल नै धेरै राम्रो छ । डिफेन्डिङदेखि लिएर अट्याकमा समेत वान एण्ड वानले सहजै काटिदिन्छ । उसको टागे्रटपनि राम्रो छ । उसले दर्शकका लागि पनि खेलिरहेको छ । हामी एक अर्काको पर्यायवाची भएका छौं ।

हाम्रो टिमको मुख्य खेलाडी हो – देवकोटा

सुमितलाई सानैबाट मेस्सी भनेर चिनिएको हो । सानो भएको र नबढेको कारण मेस्सी भनिन्थ्यो । पहिला त्यति चासो दिएनन् अहिले ए डिभिजन फुटबल खेल्ने खेलाडी नै हो । अहिले जस्तो लगाव नदेखाएको कारण लोकल खेलाडी भएर बसेका हुन् । उमेर छ खेल पनि सानैदेखि राम्रो फुटवर्क नै राम्रो छ । अहिले हाम्रो टिमको एक मात्र कि प्लेयर भनेकै मेस्सी हो । मुख्य खेलाडी नै हो । सुरुवात देखि अहिले सम्म खेल पनि एकै किसिमको छ ।

यो पनि : जुत्ताले नरोकेको खुट्टाको कौशल