एजेन्सी – इन्डियन प्रिमियर लिग (आइपिएल) २०२२ को मेगा अक्सन आइतबार सम्पन्न भएको छ । शनिबार र आइतबार बेंगलोरमा चलेको अक्सनमा कुल ६ सय विदेशी खेलाडी सहभागी थिए । २ सय ४ खेलाडीलाई १० फ्रेन्चाइज टोलीले अक्सनमा खरिद गरेका छन् ।

अक्सनमा १ सय ३७ भारतीय र ७७ विदेशी खेलाडी ब्रिक्री भए । अक्सनमा कुल ५५१.७ भारु खर्च भएको छ । एक टोलीले बढीमा ९० करोड भारु खर्च गर्न पाउने थिए । मेगा अक्सनमा यो पटक सर्वाधिक महँगो मूल्यमा भारतीय युवा विकेटकिपर ईशान किशन बिक्री भए । उनलाई मुम्बई इन्डियन्सले १५ करोड २५ लाख भारुमा अनुबन्ध गर्यो । दीपक चाहरले पनि चेन्नईमा अप्रत्याशित मूल्य पाए ।

आइपिएल अक्सनमा महँगो मूल्य पाउने अधिकांश भारतीय खेलाडी छन् । फ्रेन्चाइज टोलीले यस पटक भारतीय खेलाडीलाई बढी प्राथमिकतामा राखेका थिए । अक्नसमा विक्ने अधिकांश अलराउन्डर छन् । तीव्र गतिका बलिङ अलराउन्डरले बढी मूल्य पाएका थिए । आइपिएल २०२२ को मेगा अक्सनमा सर्वाधिक महँगो मूल्य पाउने २० खेलाडी यस प्रकार छन्

२०. शिखर धवन, ८ करोड २५ लाख भारु

भारतीय बायाँ हाते अनुभवी ब्याटर शिखर धवनलाई पन्जाब किंग्सले ८ करोड २५ लाख भारुमा किनेको थियो । पछिल्लो दुई सिजन दिल्ली लगातार फाइनलमा पुग्दा धवनको योगदान महत्वपूर्ण थियो ।

दिल्लीलाई पहिलो पटक फाइनलमा पुर्याउन धवनले २०२१ मा उत्कृष्ट प्रदर्शन गरेका थिए । धवनले २०१९ देखि २०२१ सम्म दिल्लीबाट खेले । २०१४ देखि २०१८ सम्म हैदराबादबाट खेलेका थिए । २०१६ मा हैदराबादले उपाधि जित्दा धवन टोलीका महत्वपूर्ण सदस्य थिए ।

२०१४ देखि २०१७ सम्म धवनले १२ करोड ५० लाख भारु पाउँदै आएका थिए । २०१८ मा उनले ५ करोड २० लाख भारु पाएका थिए । धवनले गतवर्ष आइपिएलमा लगातार दुई शतक प्रहार गरेका थिए । जुन आइपिएल इतिहासमा लगातार दुई शतक प्रहार गर्ने पहिलो खेलाडी हुन् । सुरुवाती केहि समय लिएर खेल्ने धवन क्रिजमा टिकेपछि राम्रो अन्त्य गर्ने गर्दछन् ।

१९. टिम डेविड, ८ करोड २५ लाख भारु

सिंगापुर राष्ट्रिय क्रिकेट टोलीका अलराउन्डर टिम डेविडलाई मुम्बई इन्डियन्सले ८ करोड २५ लाखमा किनेको थियो । पछिल्लो समय विश्व क्रिकेटको विभिन्न फ्रेन्चाइज लिगमा प्रभाव जमाइरहेका डेविडले घरेलु क्रिकेट भने अष्ट्रेलियाबाट खेल्दै आएका छन् । सिंगापुरमा जन्मिएका डेविडले आफ्नो बाल्यकाल सिंगापुरमा बिताएका थिए । अष्ट्रेलियाकै नागरिक भएपनि जन्मस्थान सिंगापुर भएकाले आइसीसीको नियम अनुसार उनले सिंगापुरबाट अन्तर्राष्ट्रिय क्रिकेट खेल्न पाउँछन् ।

डेविडले सन् २०१९ मा विश्वकप छनोट दौरान नेपालविरुद्ध सानदार प्रदर्शन गरेका थिए । नेपालविरुद्ध महत्त्वपूर्ण खेलमा ४३ बलको सामना गर्दै ७७ रन जोडेका डेविड म्यान अफ द म्याच भएका थिए । उनी उक्त छनोट प्रतियोगिताको उत्कृष्ट ब्याट्सम्यान घोषित भएका थिए । हाल पाकिस्तान सुपर लिगमा मुल्तान सुल्तानबाट पनि उत्कृष्ट प्रर्दशन गरि राखेका छन् ।

१८. शिम्रन हेटमायर, ८ करोड ५० लाख भारु

वेस्टइन्डिजका विष्फोटक ब्याटर शिम्रन हेटमायरलाई राजस्थान रोयल्सले अक्सनमा ८ करोड ५० लाख भारु खर्चेको थियो । मध्यक्रममा विष्फोटक ब्याटिङको क्षमता राख्न सक्ने हेटमायरलाई दिल्लीले यस सिजनमा फुकुवा गरेको थियो ।

गत वर्ष दिल्लीले हेटमायरलाई ७ करोड ७५ लाखमा किनेको थियो । हेटमायरलाई २०२० मा दिल्लीले ७ करोड ७५ लाख भारुमा किनेको थियो । त्यसको अघिल्लो सिजन बेंगलोरबाट ४ करोड २० लाखमा खेलेका थिए । बायाँ हाते मध्यक्रमका भरपर्दा आक्रामक शैलीका ब्याटर सबै फ्रेन्चाइजलाई आवश्यक पर्दा महँगो मूल्य पाएका हुन् । उनले वेस्टइन्डिजबाट ४२ टि२० आईमा ६ सय ६६ रन बनाएका छन् ।

१७. राहुल त्रिपाठी, ८ करोड ५० लाख

आइपिएलमा ओपनर र शीर्षक्रममा लगातार उत्कृष्ट प्रदर्शन गर्दै आएका राहुल त्रिपाठीलाई सनराइजर्स हैदराबादले ८ करोड ५० लाख भारुमा अनुबन्ध गरेको थियो । गतवर्ष कोलकताबाट राहुलले १७ खेलमा ३ सय ९७ रन बनाएका थिए ।

भरपर्दा ब्याटर हुँदा उनलाई लिन धेरै फ्रेन्चाइज टोलीले रुचि देखाएका थिए । न्यूनतम ४० लाख भारु मूल्य राखेका उनलाई कोलकता, चेन्नई र हैदराबादबीच प्रतिस्पर्धा भएपछि करोडको मूल्य पाएका थिए ।

१६. जेसन होल्डर, ८ करोड ७५ लाख भारु

वेस्टइन्डिजका अलराउन्डर जेसन होल्डरलाई लखनऊ सुपर जायन्टसले ८ करोड ७५ लाख भारु खर्चेर अनुबन्ध गर्यो । वर्तमान समयका एक उत्कृष्ट अलराउन्डर होल्डरले न्यूनतम मूल्य १ करोड ५० लाख रुपैयाँ राखेका थिए । मुम्बई, चेन्नई, राजस्थान र लखउनबीच प्रतिस्पर्धा भएको थियो ।

होल्डर तीव्र गतिसँगै आक्रामक ब्याटिङको क्षमता राख्छन् । अग्ला कदका होल्डरको पछिल्लो समय लय पनि उत्कृष्ट छ । केहि दिन अघिमात्र भारतसँग तेस्रो ओडिआई खेलमा चार विकेट र पहिलो ओडिआईमा ५७ रन बनाएपछि झन् बढी फ्रेन्चाइज टोली आर्कषित भएका थिए । जनवरी अन्तिममा इंग्ल्यान्डसँगको पाँच टि२० आई सिरिज वेस्टइन्डिजले ३–२ ले जित्दा होल्डर प्लेयर अफ द सिरिज चुनिएका थिए ।

पाँचौं खेलमा ह्याट्रिक सहित पाँच विकेट र पहिलो खेलमा ७ रन खर्चेर ४ विकेट लिएका थिए । दोस्रो खेलमा २, तेस्रोमा १ र चौथोमा ३ विकेट लिदै उत्कृष्ट प्रदर्शन गरेका थिए । ब्याटिङ र बलिङ दुबैबाट खेल जिताउन सक्ने खुबी भएको कारण उनले महँगो मूल्य पाएका हुन् । यसअघिको सिजन उनले हैदराबादबाट खेलेका थिए ।

१५. वासिङटन सुन्दर, ८ करोड ७५ लाख भारु

स्पिन अलराउन्डर वासिन्टन सुन्दरलाई सनराइजर्स हैदराबादले अक्सनमा ८ करोड ७५ लाख भारु खर्चेको छ । स्पिनसँगै तल्लोक्रममा ब्याटिङको क्षमता राख्ने सुन्दरले महँगो मूल्य पाएका हुन् । उनलाई बेंगलोरले फुकुवा गरेको थियो । सुन्दरले भारतीय र घरेलु क्रिकेट दुबैमा नयाँ बलरका साथ पावर प्लेमा उत्कृष्ट बलिङ गर्दै आएका छन् । तल्लोक्रममा राम्रो ब्याटिङको क्षमता पनि राख्छन् । जसको कारण उनले महँगो मूल्य पाएका हुन् ।

१४ . राहुल टेवाटिया, ९ करोड भारु

अलराउन्डर राहुल टेवाटियालाई नयाँ टोली गुजरात टाइटन्सले ९ करोड भारु खर्चेको थियो । न्यूनतम मूल्य ४० लाख राखेका टेवाटियालाई किन्न चेन्नई, पन्जाब र गुजरात टाइटन्सबीच प्रतिस्पर्धा भएको थियो ।

टेवाटिया लेगस्पिनसँगै तल्लोक्रममा आक्रामक ब्याटिङको क्षमता राख्छन् । दुई वर्षअघि राजस्थान रोयल्सले पन्जाबलाई ४ विकेटले पराजित गर्दै कीर्तिमान रच्दा टेवाटिया नायक बनेका थिए । जितका लागि २ सय २४ रनको विशाल लक्ष्य पछ्याएको राजस्थानले १९।३ ओभरमा ६ विकेटको क्षतिमा पूरा गर्यो ।

राजस्थानको जितमा राहुल टेवाटिया ३१ बलमा ७ छक्का ५३ रनको महत्त्वपूर्ण योगदान दिए । १८ औं ओभरमा राहुल तेवटियाले तीव्र गतिका बलर शेल्डन कटरेललाई एकै ओभरमा ५ छक्का सहित ३० रन जोडेपछि उनी एक एक चर्चामा आएका थिए ।

१३. शाहरुख खान, ९ करोड भारु

पन्जाब किंग्सले शाहरुख खानलाई अक्सनबाट टोलीमा फर्काउन ९ करोड भारु खर्चेको थियो । भारतीय युवा फिनिसर शाहरुख खानलाई किन्न अक्सनमा ४० लाख न्यूनतम मूल्य राखेका थिए ।

उनलाई अक्सनमा किन्न पन्जाब, चेन्नई र कोलकताबीच प्रतिस्पर्धा भएको थियो । २६ वर्षिय शाहरुख खानले तामिल नाइडुबाट घरेलु क्रिकेट खेल्ने गर्दछन् । गतवर्ष पन्जाबले उनले ११ खेलमा १ सय ५३ रन बनाएका थिए । घरेलु क्रिकेटमा हार्ट हिटरको छवी बनाएपछि उनलाई किन्न अक्सनमा प्रतिस्पर्धा भएको थियो । गत वर्ष उनलाई पन्जाबले ५ करोडमा किनेको थियो ।

१२. कागिसो रबाडा – ९ करोड २५ लाख

दक्षिण अफ्रिका तीव्र गतिका बलर कागिसो रबाडालाई पन्जाब किंग्सले ९ करोड २५ लाख भारुमा अनुबन्ध गरेको छ । रबाडा तीव्र गति, योर्कर र म्याच विनर बलर हुन् । रबाडाले आइपिएलमा लगातार उत्कृष्ट प्रदर्शन गर्दै आएका छन् । दिल्लीले सबैलाई आश्चर्य पार्दै रबाडालाई फुकुवा गरेको थियो ।

रबाडाले अक्सनमा २ करोड भारु न्यूनतम मूल्य राखेका थिए । रबाडालाई किन्न गुजराज, दिल्ली र पन्जाबबीच प्रतिस्पर्धा भएको थियो । रबाडा लगातार १ सय ५० प्रतिघण्टा किलोमिटरको रफ्तारमा बलिङ गर्नसक्ने खुबी भएका खेलाडी हुन् । रबाडा डेथ ओभरका विश्वकै घातक बलरमा पर्दछन् ।

डेथ ओभरमात्र होईन नयाँ बल र मध्यक्रममा पनि त्यतिनै उत्कृष्ट प्रदर्शन गर्दै आएका छन् । २०२० मा दिल्लीलाई पहिलो पटक फाइनलमा पुर्याउन रबाडाले १७ खेलमा ३० विकेट लिँदै पर्पल क्याप जितेका थिए । रबाडाले २०१९ मा १२ खेलमा २५ विकेट लिँदै सानदार प्रदर्शन गरे । दिल्लीले २०१८ मा ४ करोड २० लाखमा अनुबन्ध गरेको थियो । उनी तल्लोक्रममा ठूला सटको क्षमता पनि राख्छन् ।

११. आवेश खान – १० करोड भारु

भारतीय तीव्र गतिका बलर आवेश खानलाई नयाँ टोली लखनउ सुपर जायन्टले १० करोड भारु किन्यो । आवेश खानले धेरैलाई आश्चर्य पार्दै न्यूनतम मूल्य २० लाख राखेका थिए ।

उनलाई अक्सनम किन्न चेन्नई, हैदराबाद र मुम्बईले पनि इच्छा देखाएपछि लखनउले १० करोड खर्चिनु परेको हो । गतवर्ष दिल्लीलाई फाइनल सम्म पुर्याउन आवेश खानले १६ खेलमा २४ विकेट लिँदै दोस्रो स्थानमा थिए । जारी सिजनमा सर्वाधिक महँगो मूल्य पाउने अनक्याप्ड खेलाडी पनि हुन् ।

१०. लोकी फर्गुनसन, १० करोड भारु

न्युजिल्यान्डका तीव्र गतिका बलर लोकी फर्गुसनलाई गुजरात टाइटन्सले १० करोड मूल्य टोलीमा भित्र्याउन सफल भयो । प्रतिघण्टा १ सय ५० माथिको गतिमा बलिङ गर्ने फर्गुसनले यसअघि कोलकताबाट आइपिएल खेलेका थिए ।

कोलकतामा यसअघि उनले १ करोड ६० लाखमात्र मूल्य पाएका थिए । तर यो सिजन उनलाई किन्न दिल्ली, गुजरात र बेंगलोरबीच प्रतिस्पर्धा भएपछि न्यूनतम मूल्य २ करोडबाट १० करोडमा पुगेका थिए । फर्गुसनले न्युजिल्यान्ड र आइपिएलमा राम्रो प्रदर्शन गर्दै आएका छन् ।

९. प्रसिद्ध कृष्ण, १० करोड भारु

भारतीय तीव्र गतिका बलर प्रसिद्ध कृष्णलाई राजस्थान रोयल्सले १० करोड मूल्य अक्सनमा खर्चिएको छ । न्यूनतम १ करोड मूल्य राखेका उनलाई किन्न लखउन र राजस्थानबीच प्रतिस्पर्धा भएको थियो । यसै साता वेस्टइन्डिजसँगको तीन ओडिआई खेलमा उच्च प्रदर्शन गर्दै प्लेयर अफ द सिरिज चुनिएछि उनको मूल्य झनै बढेको थियो । उनी गति र बाउन्सरका लागि चिनिन्छन् । यसअघि कोलकतामा उनले न्यूनतम २० लाख मात्र पाएका थिए ।

८. हर्षल पटेल, १० करोड ७५ लाख भारु

२०२१ का पर्पल क्याप विजेता हर्षल पटेललाई टोलीमा फर्काउन रोयल च्यालेन्जर्स बेंगलोरले १० करोड ७५ लाख भारु खर्चिनु पर्यो । पटेलले २०२१ मा १५ खेलमा ३२ विकेट लिँदै कीर्तिमान कायम गरेका थिए ।

एकै सिजनमा सर्वाधिक विकेट लिने बलरको कीर्तिमान ड्वेन ब्राभोसँग बराबरी गरेका थिए । पटेलले मध्यक्रम र डेथ ओभरमा राम्रो बलिङ गर्दै आएका छन् । तल्लोक्रममा ब्याटिङको क्षमता पनि राख्छन् । गतवर्ष उत्कृष्ट प्रदर्शनपछि उनले भारतीय टोली हुँदै अक्सनमा महँगो मूल्य पाएका हुन् ।

७. शार्दुल ठाकुर, १० करोड ७५ लाख भारु

भारतीय तीव्र गतिका बलर शार्दुल ठाकुर महँगो मूल्यका साथ दिल्ली क्यापिटल्समा अनुबन्ध भएका छन् । पछिल्लो समय भारतीय टोलीमा तीव्र गति र तल्लोक्रममा उत्कृष्ट ब्याटिङ गर्दै आएका ठाकुरलाई दिल्लीले १० करोड ७५ लाखमा भित्र्याएको हो । भारतले गतवर्ष अष्ट्रेलियामा टेस्ट सिरिज जित्दा उनी नायक बनेका थिए ।

तल्लोक्रममा ठूला ठूला सट प्रहार गर्ने गर्दछन् । ठाकुरले यस सिजनमा न्यूनतम मूल्य २ करोड भारु राखेका थिए । दिल्ली, पन्जाब र चेन्नईबीच प्रतिस्पर्धा भएको थियो । २०२१ मा चेन्नईलाई च्याम्पियन बनाउन उनले १६ खेलमा २१ विकेट लिदै उत्कृष्ट प्रदर्शन गरेका थिए । चेन्नईमा उनले २ करोड ६० लाख भारु पाउँदै आएका थिए ।

६. निकोलस पुरन, १० करोड ७५ लाख भारु

वेस्टइन्डिजका विकेटकिपर ब्याटर निकोलस पुरनलाई सनराइजर्स हैदराबादले १० करोड ७५ लाख भारुमा अनुबन्ध गरेको छ । पुरनलाई २०१९ को अक्सनमा पन्जाब किंग्सले ४ करोड २० लाख भारुमा अनुबन्ध गरेको थियो । बायाँ हाते पुरन आक्रामक ब्याटिङ, उत्कृष्ट फिल्डिङ र कप्तानका विकल्प भएका युवा स्टार हुन् ।

पुरनले अक्सनमा न्यूनतम मूल्य १ करोड ५० लाख राखेका थिए । उनलाई किन्न चेन्नई, हैदराबाद र कोलकताबीच प्रतिस्पर्धा भएको थियो । अन्तिममा हैदराबादले बाजी मार्यो । पुरन कप्तानको लागि राम्रो विकल्प पनि हुन् । वेस्टइन्डिजका उपकप्तान पुरनले काइरन पोलार्डको अनुपस्थितीमा राम्रो प्रभाव छाडेका छन् ।

५. वानिन्दु हसरंगा, १० करोड ७५ लाख भारु

श्रीलंका लेगस्पिन अलराउन्डर वानिन्दु हसरंगालाई रोयल च्यालेन्जर्स बेंगलोरले १० करोड ७५ लाख भारुमा किन्यो । आइपिएल इतिहासमा वानिन्दु श्रीलंकाबाट सर्वाधिक महँगो मूल्यमा विक्ने खेलाडी हुन् । वानिन्दु वर्तमान टि२० आइसिसी विश्व वरियता शीर्षस्थानका बलर हुन् । वानिन्दुले अन्तर्राष्ट्रिय क्रिकेटमा लगातार म्याच विनिङ प्रदर्शन गर्दै आएका छन् ।

वानिन्दुले ८३ टि२० खेलमा तीन अर्धशतक सहित ९ सय ७९ रन बनाउनुको साथैं १ सय १० विकेट लिएका छन् । गत वर्ष एडम जाम्पाको अनुपस्थित भएपछि उनको स्थानमा बेंगलोरबाट वानिन्दुले किनेका हुन् । उनले अक्सनमा १ करोड न्यूनतम मुल्य राखेका थिए । तर पन्जाब, हैदराबद र बेंगलोरबीचको लडाईंले महँगो मूल्य पाएका हुन् ।

४. श्रेयस ऐर, १२ करोड २५ लाख भारु

भारतीय युवा ब्याटर श्रेयस ऐरलाई कोलकता नाइट राइडर्सले १२ करोड २५ लाख भारुमा खर्चियो । अक्सनमा ऐरलाई किन्न दिल्ली क्यापिटल्स, लखनऊ सुपर जायन्ट, कोलकता नाइट राइडर्सबीच कडा प्रतिस्पधा भएको थियो । ऐरको कप्तानीमा दिल्ली क्यापिटल्स २०२० मा पहिलो पटक फाइनलमा पुगेको थियो ।

२०१५ देखि दिल्लीबाट अइपिएल खेल्दै आएका ऐरले ८७ खेलमा १६ अर्धशतक सहित २ हजार ३ सय ७५ रन बनाएका छन् । ऐरले न्यूनतम मूल्य २ करोड राखेका थिए । उनले दिल्लीमा ७ करोड भारु मूल्य पाएका थिए । ऐर मध्यक्रमका भरपर्दा ब्याटर हुन् । कप्तानका भारतीय पहिलो रोजाईका ब्याटर हुन् । कोलकताले उनलाई नै कप्तानी दिने लगभग निश्चित छ ।

३. लियाम लिभिङस्टोन -११ करोड ५० लाख भारु

इंग्ल्यान्डका शीर्षक्रमका ब्याटर लियाम लिभिङस्टोनलाई पन्जाब किंग्सले ११ करोड ५० लाख भारु खर्चियो । उनले अक्सनमा न्यूनतम मूल्य १ करोड भारु तोकेका थिए । उनलाई अक्सनमा चेन्नई, कोलकता,पन्जाब र गुजरात टाइटन्सबीच कडा प्रतिस्पर्धा भएपछि यस सिजनको सर्वाधिक महँगो विदेशी खेलाडी बन्न पुगेका हुन् । उनी आक्रामक ब्याटिङको लागि माहिर छन् । अग्ला कदका लिभिङस्टोन ठूला ठूलाको क्षमता राख्छन् । पार्टटाइम बलरमा उनले लेगस्पिनर र अफ स्पिन दुबै गर्दछन् ।

गत जुलाईमा उनले पाकिस्तानविरुद्ध पहिलो टि२० आई खेलमा पाँचौं नम्बरमा ब्याटिङ गर्दै ४३ बलमा ६ चौका र ९ छक्कासहित १ सय ३ रनको उत्कृष्ट इनिङ खेलेका थिए । टि२० विश्वकप सेमिफाइनलमा न्युजिल्यान्डविरुद्ध उत्कृष्ट प्रदर्शन गरेका थिए ।

उनी मध्यक्रमका भरपर्दा ब्याटर हुन् । विष्फोटक ब्याटिङ शैली र बलिङमा भेराइटी हुँदा सबै फ्रेन्चाइजले किन्न खोजेपछि महँगो मूल्यमा बिकेका हुन् । उन क्रिजमा टिकेमा एक्लै खेल जिताउन सक्ने खुबी भएका खेलाडी हुन् ।

२. दीपक चाहर, १४ करोड भारु

तीव्र गतिका बलर दीपक चाहर अक्सनमा सर्वाधिक मूल्य पाउने भारतीय बलर हुन् । दीपक पावर प्लेमा नयाँ बलका साथ स्विङ र तल्लोक्रममा राम्रो ब्याटिङको क्षमता राख्छन् । तीव्र गतिको बलिङ अलराउन्डरको कारण उनलाई अक्सनमा चेन्नईले १४ करोड खर्चेर फिर्ता लिएको थियो । यसअघि चेन्नईबाट खेल्दै दीपकले महत्वपूर्ण योगदान दिँदै आएका थिए ।

दीकपकले चेन्नईमा यसअघि ८० लाख मात्र मूल्य पाउँदै आएका थिए । यस सिजनमा फुकुवा गरेपनि उनले २ करोड न्यूनतम मूल्य राखेका थिए । सुरुमा दिल्ली र हैदराबादबीच कडा प्रतिस्पर्धा भएको थियो । तर ११ करोडपछि चेन्नईले पनि रुचि देखाउँदै १४ करोडमा भित्र्याएको थियो ।

दीपकले गत जुलाईमा श्रीलंकासँग दोसो ओडिआई खेल जिताउन ६९ रन बनाउनुको साथै २ विकेट लिएका थिए । अघिल्लो महिना दक्षिण अफ्रिकासँग ५४ र केहि दिनअघि वेस्टइन्डिजसँग ३८ रन बनाएपछि सबै फ्रेन्चाइज टोलीले नजर लगाएका थिए ।

१. ईशान किशन, १५ करोड २५ लाख भारु

भारतीय बायाँ हाते ब्याटर ईशान किशनलाई मुम्बई इन्डियन्सले कीर्तिमानी मूल्यमा फर्काएको छ । मुम्बईले किशनलाई १५ करोड २५ लाख भारुमा खर्चेको थियो । ईशान किशनलाई किन्न पन्जाब किंग्स, सनराइजर्स हैदराबाद र मुम्बईबीच कडा प्रतिस्पर्धा भएको थियो । ईशान किशन आइपिएल अक्सन इतिहासमा विकेटकिपरको रुपमा सर्वाधिक मूल्य पाउने खेलाडी भएका छन् ।

ईशान किशनलाई मुम्बईले रिलिज गरेको थियो । यसअघि मुम्बईमा किशनले ६ करोड २० लाख भारु पाएका थिए । किशन टि२० का भारतीय विशेष पर्दछन् । मुम्बईलाई २०२० को उपाधि जिताउन ईशानले १४ खेलमा ५ सय १६ रनका साथ उत्कृष्ट प्रदर्शन गरेका थिए । किशन ओपनिङ र मध्यक्रम दुबैमा राम्रो ब्याटिङ गर्नेगर्दछन् ।

किशन ओडिआई र टि२० आई डेब्यूमै अर्धशतक प्रहार गर्ने पहिलो भारतीय खेलाडी हुन् । किशनले २ करोड न्यूनतम मूल्य राखेका थिए ।

यो पनि : सन्दीप आइपिएलमा नबिक्नुको प्रमुख पाँच कारण

एकै रातमा ३१ करोडको मालिक बने चाहर दाजुभाइ

आर्चर र‌ बुमराहले एकै टोलीबाट आइपिएल खेल्ने

आइपिएलमा नबिकेका राष्ट्रिय टोलीका ४ कप्तान