काठमाडौं (हाम्रो खेलकुद) – दुई बायाँ हाते तीव्र गतिका युवा बलर कमल खत्री र रिजन ढकालले चौथो संस्करणको एभरेष्ट प्रिमियर लिग (इपिएल) साविक विजेता ललितपुर प्याट्रियटर्सबाट खेल्ने भएका छन् ।

ललितपुरले दुई बायाँ हाते तीव्र गतिका बलर कमल र रिजनलाई टोलीमा अनुबन्ध गरेको हो । यी दुबै खेलाडीलाई ललितपुरले न्यूनतम मूल्य ५० हजारमा टोलीमा अनुबन्ध गरेको हो । इपिएलले कोरोना कारण हरेक टोलीमा एक एक खेलाडी संख्या बढाएको छ । फ्रेन्चाइज टोलीले चोट, सन्न्यास, विदेशमा भएको वा कुनै कारण टोलीमा स्थान खाली भएमा शुक्रबार युवा खेलाडी पूरा गर्न मिनि अक्सन भएको थियो ।

कमल यसअघिको सिजनमा ललितपुरमा ट्यालेन्ट हन्टको रुपमा टोलीमा थिए । प्रधानमन्त्री कपमा प्रदेश १ ले कमल खत्रीलाई टोलीमा नराखेपछि आलोचना समेत भएको थियो । कमलले २०१९ मा पोखरा प्रिमियर लिगको दोस्रो संस्करणमा बुटवल ब्लास्टरबाट विराटनगर टाइटन्सविरुद्ध खेल्दै एक विकेट लिएका थिए ।

कमल नेपाल टोली ओमान भ्रमणको लागि तयारी गर्दा टियुमा नेट बलरको रुपमा रहेका थिए । नेट बलरको रुपमा राम्रो छाप छाडेपछि ज्ञानेन्द्र मल्ल कप्तान रहेको ललितपुरले टोलीमा लिने निर्णय लिएको हो । ‘इपिएल खेल्छु भन्ने खासै आशा थिएन । ललितपुरले रिलिज गरेपछि सम्भावना कम थियो । नेट बलरको रुपमा खेल्ने अवसर पाउँदा त्यसले इपिएल खेल्न सहयोग गर्यो’, कमलले भने ।

रिजन नेपालका लागि यू१६ र यू१९ प्रतिनिधित्व गरि सकेका छन् । बागमती प्रदेशका रिजन ढकाल प्रधानमन्त्री कप प्रतियोगितामा रहेपनि सकै खेलमा बेन्चमा बसेका थिए । २०१७ मा नेपालका लागि यू१९ खेलेका उनी चोटका कारण केहि समय मैदान बाहिर रहनु पर्यो ।

‘पहिलो पटक फ्रेन्चाइज लिग खेल्न लागेको हुँ । पहिला कुनैपनि फ्रेन्चाइज लिगमा थिएन । यसपटक ललितपुरले लिएपछि खेल्न उत्साहित र खुसी छु’, रिजनले भने । ‘नेपालको ठूलो प्रतियोगिता हो । विदेशी खेलाडीहरुबाट धेरै कुरा सिक्न पाइन्छ । प्लेइङ ११ मा परेभने आफ्नो क्षमता देखाउने अवसर रहने छ’, उनले भने ।

रिजन ब्याक (पछाडि) चोटका कारण सुधार हुन समय लागेको थियो । नशा च्यापिएको कारण उनलाई ठिक हुन समय लागेको थियो ।ललितपुरले विदेशी खेलाडीको रुपमा इंग्ल्यान्डका एलेक्स ब्लेकको नाम सार्वजनिक गरेको छ ।

ललितपुर गतवर्ष विदेशी खेलाडीको रुपमा पाकिस्तानका हमाद हसन, हसन खान, मिर हाम्जा र श्रीलंका बायाँ हाते ओपनर उपुल थरंगालाई अनुबन्ध गरेको थियो । तर कोरोना कारण समयमै इपिएल हुन सकेन । साविक विजेता ललितपुरमा ज्ञानेन्द्र मल्ल, सन्दीप जोरा, पवन सरार्फ, कुशल भुर्तेल, सोनु तामाङ र योगेन्द्रसिंह कार्की लगायतका खेलाडी छन् । ट्यालेन्ट हन्टबाट बिभत्सु थापा र अरियो पौडेल छानिएका थिए । इपिएल असोज ९ देखि २३ सम्म टियुमा हुने छ ।

यो पनि पढ्नुहोस् :हसिम र गौतमले इपिएल खेल्ने

सन्दीप र प्रतिशले विराटनगरबाट इपिएल खेल्ने

गुलशन महँगो मूल्यमा काठमाडौंमा अनुबन्ध

कर्णालीका कप्तान रविन्द्रले इपिएल खेल्ने

देव र राजेशले चितवनबाट इपिएल खेल्ने