मस्कट (हाम्रो खेलकुद) – युएईका १९ वर्षिय विकेटकिपर युवा ब्याटर वृत्य अरविन्द आइसिसी टि२० विश्वकप छनोट ए को सर्वोत्कृष्ट खेलाडी (प्लेयर अफ द टुनामेन्ट) चुनिएका छन् । युएईलाई च्याम्पियन बनाउँदै आगमी अक्टोबर नोभेम्बरमा अष्ट्रेलियामा हुने टि२० विश्वकपमा पुर्याउन उत्कृष्ट प्रदर्शन गरेका अरविन्द प्रतियोगिता सर्वोत्कृष्ट खेलाडी चुनिएका हुन् ।

प्रतियोगितामा उनले ५ खेलमा २ मा अर्धशतक सहित २ सय ६७ रनका साथ सर्वाधिक रन बनाउने खेलाडीको सूचिमा शीर्षस्थानमा रहे । प्रतियोगितामा २५ चौका र ११ छक्का प्रहार गरेका थिए । उनले चार देश सम्मिलित टि२० आई सिरिज र विश्वकप छनोटमा गरि कुल ३ सय ३६ रन बनाएका थिए ।

युएईले विश्वकप छनोटमा समूह चरणमा आयरल्यान्डलाई १८ रनले हराउँदा अरविन्दले ६७ बलमा १३ चौका र १ छक्कासहित ९७ रनको इनिङ खेलेका थिए । ब्याटिङमा उनको एकल उच्च प्रदर्शनमा युएईले टेस्ट टोली आयरल्यान्डलाई दोस्रो पटक हराएको थियो । त्यसअघि सिरिजमा आयरल्यान्डविरुद्ध ३६ बलमा ३ चौका र २ छक्कासहित ५० रनको इनिङ खेलेका थिए । जसको सहयोगमा युएई १३ रनले विजयी भएको थियो ।

युएई बहराइनसँग २ रनले पराजित भएको थियो । १ सय ७३ रनको लक्ष्य पछ्याउनेक्रममा युएईले ६ विकेटको क्षतिमा १ सय ७० रन बनाएको थियो । अरविन्दले ५२ बलमा ६ चौका र ५ छक्कासहित ८४ रनको उत्कृष्ट अविजित इनिङ खेलेका थिए । उक्त खेलमा युएईलाई जितको लागि अन्तिम ओभरमा २७ रन र सेमिफाइनलमा पुग्न १२ रन चाहिँएको थियो ।

अरविन्दले २ छक्का र २ चौकासहित २४ रन जोड्दै सेमिफाइनल पक्का गरेका थिए । अरविन्दले सेमिफाइनलमा नेपालविरुद्ध २३ बलमा ५ चौका र ३ छक्कासहित ४६ रनको विष्फोटक सुरुवात गर्दै युएईलाई विशाल योगफलको आधार तय गर्दै आउट भएका थिए । जमर्नीसँग ४० रन जोडेका थिए ।

युएईले फाइनलमा आयरल्यान्डलाई ७ विकेटले हराउँदै उपाधि जितेको छ । सेमिफाइनलमा नेपाललाई ६८ रनले हराउँदै दोस्रो पटक विश्वकपमा स्थान पक्का गराएको थियो ।

वासिमको कीर्तिमानी शतकमा युएईलाई उपाधि

ओमानलाई हराउँदै नेपाल विश्वकप छनोटमा तेस्रो